Tíndu stafafuruköngla og söfnuðu fyrir snjótroðara

Skógræktarfélag Eyfirðinga safnar nú af kappi fyrir nýjum snjótroðara og nálgast nú 21 milljón króna eftir að Akureyrarbær samþykkti í liðinni viku að styrkja verkefnið með 15 milljón króna framlagi. Þá viku fékk söfunin einnig úthlutað 2 milljónum króna úr pokasjóði.

Troðarinn sem skógarmenn nyðra hafa augastað á kostar um 35 milljónir króna. Gamli troðarinn sem þjónað hafði skíðagöngufólki dyggilega í áraraðir lagði upp laupana í fyrravor.

Ingólfur Jóhannsson framkvæmdastjóri Skógræktarfélagsins segir að áður en framlag Akureyrarbæjar kom til hafi framlög aðallega komið frá daglegum notendur Kjarnaskógar. Stjórn félagsins hefur skipulega unnið að því nú í haust að afla styrkja frá fyrirtækjuma og liggja vilyrði fyrir héðan og þaðan svo talan gæti hækkað hratt þessa daga. „Við erum þessa dagana að afla tilboða í tæki sem gerir okkur kleift að sinna verkefninu, að troða skíðabrautir í Kjarnaskógi, til frmatíðar,“ segir hann. 

Efnt var til fjáröflunarátaks á dögunum til að styrkja söfnunina, en hátt í 50 manns mættu með góða skapið í farteskinu í Laugalandsskóg á Þelamörk og söfnuðu stafafurukönglum.

Áður en haldið var út í skóg fræddi Valgerður Jónsdóttir hjá Skógræktinni viðstadda um mismunandi kvæmi stafafuru og hvernig þekkja má tveggja ára köngul. Eftir fræðsluna hélt fólk út í skóginn þar sem búið var að fella stöku tré en einnig var hægt að teygja sig upp í greinar og tína. 

200 þúsund fyrir 100 kíló

Hópurinn náði um eitt hundrað kílóum af könglum, hreinsuðum og vel völdum. Um 200 þúsund krónur fást fyrir könglana sem leggjast beint inn á söfnunarreikning fyrir snjótroðara.

Söfnuninni lýkur 22. febrúar 2022 og verður nú farið á fullt við að vekja athygli á málinu, m.a. biðlað til sveitarfélaga, fyrirtækja á svæðinu og sótti í ýmsa sjóði.

Afrakstur dagsins, 100 kg! Það er einn tíundi af því tonni sem Skógræktin þarf þetta árið.