Tillaga að fastri starfsstöð fyrir þyrlu frá Landhelgisgæslunni

Atlantsflug hefur sent sveitarstjórnum víða um land erindi þess efnis að nú liggi fyrir Alþingi tillaga þess efnis að koma eigi fastri starfsstöð fyrir eina af þyrlum Landhelgisgæslu Íslands á Akureyri.

Gangi málið eftir þá á að staðsetja á Akureyri stóra björgunarþyrlu Landhelgisgæslunnar af gerðinni Airbus Helicopters H225, sem er hönnuð fyrst og fremst fyrir leitar- og björgunarverkefni. Í kynningu á málinu frá Atlantsflugi kemur m.a. fram að staðsetningin á Akureyri hafi verulega annmarka þegar horft er til raunverulegra þarfa almennings fyrir bráðaþjónustu, bæði í dreifðum byggðum og í stærri þéttbýliskjörnum.

Þá kemur einnig fram að H225 þyrlan sé fyrst og fremst sérhæfð leitar- og björgunarþyrla en ekki hönnuð fyrir daglega bráðaþjónustu, en útkalls- og viðbragðstími slíkra véla er almennt lengri en hjá sérhæfðum sjúkraþyrlum.