Til þess var leikurinn gerður
Stjórn Búsældar hefur fyrir sitt leyti samþykkt söluna á Kjarnafæði Norðlenska til Kaupfélags Skagfirðinga, með þeim fyrirvara að hver og einn hluthafi fái að taka afstöðu með því að samþykkja eða hafna sölu á sínum hlut.
Í Búsæld eru 464 núverandi og fyrrverandi bændur á Norður- og Austurlandi. Gróa Jóhannsdóttir, sauðfjárbóndi á Hlíðarenda 1 í Breiðdal og stjórnarformaður Búsældar, segir að fljótlega verði boðað til félagsfundar þar sem kauptilboð Kaupfélags Skagfirðinga verður tekið fyrir.
„Óskir bænda eru þær að með þessum kaupum skapist enn betri skilyrði til að greiða bændum betra afurðaverð.
Tíminn verður hins vegar að leiða það í ljós hvort það raungerist. Rekstur sláturhúsa er rosalega sveiflukenndur og margir óvissuþættir varðandi afkomuna í þessum kjötgreinum – til dæmis bara fjöldi ferðafólks hér á Íslandi,“ segir Gróa.
„Afurðaverð hefur verið heldur á uppleið á síðustu árum eftir mikla dýfu áranna 2016 og 2017. Við skulum vona að öll þessi hagræðing hafi í för með sér kjarabætur fyrir okkur bændur og neytendur. Til þess var nú leikurinn gerður með þessum breytingum á búvörulögum í vor þegar kjötafurðastöðvum var veitt undanþága frá samkeppnislögum til að sameinast,“ heldur Gróa áfram. Spurð um þá fákeppni sem skapist nú á Norður- og Austurlandi með sameiningu stórra kjötafurðastöðva, segir Gróa að auðvitað hafi hún áhyggjur af því. „En varðandi kjötvörumarkaðinn horfir maður svolítið á þetta þannig að samkeppnin hefur fyrst og fremst verið utanlands frá.“
