Þrír handhafar landgræðsluverðlauna
Októ Einarsson, Skógræktarfélag Kópavogs og ferðaþjónustufyrirtækið Midgard eru handhafar landgræðsluverðlaunanna 2023.
Á dögunum veitti Landgræðslan árleg landgræðsluverðlaun en þau hlutu þrír aðilar sem á ólíkan hátt hafa stuðlað að landgræðslu.
Landeigandi jarðanna Heiðarlækjar og Heiðarbrekku á Rangár- völlum, Októ Einarsson, hlaut verðlaun með því að sýna mikið frumkvæði og vera fyrirmynd annarra landeigenda í landgræðslu að því er fram kemur í umsögn Landgræðslunnar. Októ hefur unnið að því að græða jarðir sínar um árabil en þær eru illa farnar sökum jarðvegsrofs og hefur nú unnið á um 200 hektara svæði en markmið hans er að koma í veg fyrir frekari eyðingu gróðurs og jarðvegs, mynda sjálfbæra gróðurþekju og síðar skóglendi.
Kristinn H. Þorsteinsson, framkvæmdastjóra Skógræktarfélags Kópavogs, voru afhent verðlaunin fyrir hönd félagsins og verkefnis um endurheimt birkivistkerfa, sem snýr að söfnun og sáningu birkifræja. Verkefnið hófst vorið 2020 og er markmið þess að efla útbreiðslu birkiskóga með landsátaki við söfnun og dreifingu fræja. Í umsögn Landgræðslunnar segir að Skógræktarfélag Kópavogs, með Kristinn í fararbroddi, hafi borið hitann og þungann af vinnu við framkvæmd verkefnisins.
Þá hlaut ferðaþjónustufyrirtækið Midgard í Rangárþingi eystra verðlaun fyrir skýr umhverfismark- mið í tengslum við nýtingu lands í ferðaþjónustu og áherslu á umhverfis fræðslu til starfsfólks og ferðamanna. Í umsögn Landgræðslunnar segir að ferðaþjónusta sé ein tegund landnýtingar og í ljósi vaxandi ferðamennsku á Íslandi sé mikilvægt að gefa henni gaum. Í rekstri sínum hefur Midgard lagt áherslu á um- hverfismál, s.s. minni matarsóun, fræðslu nemendahópa og eflingu umhverfisvitundar starfsfólks.
