Þjóðlendumál á Austfjörðum
Fjármála- og efnahagsráðherra hefur fyrir hönd íslenska ríkisins afhent óbyggðanefnd kröfur um þjóðlendur á Austfjörðum, á svæði sem er við málsmeðferð nefndarinnar auðkennt sem svæði 11.
Nánari upplýsingar um kröfurnar, m.a. nákvæmari kort, er að finna á vefsíðu óbyggðanefndar:
Óbyggðanefnd, sem er sjálfstæð úrskurðarnefnd á stjórnsýslustigi, kynnir nú þessar kröfur ríkisins, í samræmi við ákvæði laga nr. 58/1998, til að ná til þeirra sem kunna að eiga öndverðra hagsmuna að gæta svo að þeir geti látið sig málin varða og eftir atvikum lýst kröfum á móti.
Þeir sem telja til eignarréttinda á landsvæðum sem falla innan þjóðlendukröfusvæða íslenska ríkisins hafa nú frest til 6. maí 2022 til að lýsa kröfum fyrir óbyggðanefnd. Að því búnu verða heildarkröfur kynntar og óbyggðanefnd rannsakar málin sem felur m.a. í sér umfangsmikla gagnaöflun í samvinnu við sérfræðinga á Þjóðskjalasafni Íslands. Að lokinni gagnaöflun og rannsókn á eignarréttarlegri stöðu umræddra svæða úrskurðar óbyggðanefnd um framkomnar kröfur.
Nánari upplýsingar um málsmeðferð má finna á vefsíðu óbyggðanefndar:
Óbyggðanefnd var komið á fót árið 1998 í þeim tilgangi að rannsakað yrði hvaða svæði á landinu væru utan eignarlanda og þau yrðu úrskurðuð þjóðlendur. Hlutverk nefndarinnar er þríþætt samkvæmt þjóðlendulögum, nr. 58/1998, en samkvæmt lögunum skiptist allt land í annars vegar eignarlönd og hins vegar þjóðlendur:
- Að kanna og skera úr um hvaða land telst til þjóðlendna og hver séu mörk þeirra og eignarlanda.
- Að skera úr um mörk þess hluta þjóðlendu sem nýttur er sem afréttur.
- Að úrskurða um eignarréttindi innan þjóðlendna.
Við málsmeðferð óbyggðanefndar hefur landinu verið skipt í sautján svæði. Nefndin hefur lokið umfjöllun um fjórtán þeirra en málsmeðferð á tveimur svæðum stendur nú yfir, þ.e. í Ísafjarðarsýslum og á Austfjörðum. Umfjöllun um sautjánda svæðið, þ.e. eyjar og sker umhverfis landið, er ekki hafin.
Enn fremur hefur verið sett sérstök óbyggðanefnd til að annast málsmeðferð skv. 1. málsl. 7. mgr. 10. gr. þjóðlendulaga, sbr. upplýsingar á: https://obyggdanefnd.is/serstok/
Yfirlitskort um stöðu þjóðlendumála, úrskurði sem fallið hafa og ýmsar fleiri upplýsingar í tengslum við þá má finna á vefsíðu nefndarinnar: https://obyggdanefnd.is/urskurdir/
