Tékkarnir klikka ekki

Bændablaðið fékk til prufu nýja kynslóð af hinum vinsælu Skoda Kodiaq, sem er stór og rúmgóður jepplingur með hefðbundinni dísilvél.

Fyrsta kynslóðin af Kodiaq er með mjög afgerandi útlit, með skörpum línum og hvössum hornum. Útlit annarrar kynslóðarinnar er hins vegar orðið mun mýkra og hefur Kodiaq í huga undirritaðs misst aðeins af karakternum. Það fer hins vegar ekki á milli mála að þetta er Skoda, enda fjölskyldusvipurinn sterkur.

Innrétting á pari við lúxusbíla

Þegar stigið er um borð tekur við nútímaleg og vönduð innrétting. Hart plast er í mjög litlum mæli og flest úr mjúkum efnum eða plasti með áhugaverðri áferð. Í miðju mælaborðinu er stór snertiskjár. Stýrikerfið er eins og í öðrum nýjum bílum frá Volkswagensamsteypunni. Það er nokkuð auðvelt að átta sig á því og er grafíkin falleg.

Neðar í mælaborðinu eru þrír snúningstakkar. Takkinn í miðjunni hefur ýmis hlutverk og þarf að flétta á milli þeirra. Takkarnir beggja vegna við hann eru til að stilla hita og virkja hita í sætum fyrir ökumann annars vegar og farþega hins vegar. Jákvætt er að hafa einhverja takka, enda mörgum ekki um geð að reiða sig alfarið á snertiskjá fyrir einfaldar skipanir.

Miðjustokkur nýtist vel

Nóg er af tökkum í stýrinu, bæði fyrir útvarp, akstursaðstoð, aksturstölvu og hita í stýrið. Á bak við stýrið eru þrjár stangir. Tvær eru þessar hefðbundnu fyrir stefnuljós, rúðuþurrkur og þess háttar og er ein gírstöng af svipuðum meiði og er í nýjustu rafbílunum frá Skoda og Volkswagen.

Með þessu nýtist plássið í miðjustokknum betur fyrir geymslupláss. Þar eru tvær þráðlausar hraðhleðslustöðvar fyrir síma, glasahaldarar og djúpt hólf undir armhvílunni.

Fyrirhafnarlaust aðgengi

Hæðin á sætunum er á þann veg að það krefst nánast engrar fyrirhafnar að tylla sér um borð. Framsætin í bílnum eru einstaklega þægileg þar sem þau eru stór og veita mikinn stuðning á allar hliðar og er hægt að lengja sessuna. Þau eru nokkuð stíf miðað við marga bíla, en þar sem þau eru vel formuð og stillanleg á fjölmarga vegu kemur það ekki að sök. Hægt er að draga stýrið vel út sem hentar fyrir þá sem vilja sitja aftarlega. Ökumannssætið er rafknúið, en farþegasætið fram í er stillt með handafli í þessari útfærslu. Leðurklædd sæti eru staðalbúnaður.

Í aftursætunum er gífurlega mikið pláss, jafnvel þó svo að framsætin séu í öftustu stöðu. Hávaxnir geta teygt álkuna og er ekki þrengt að fótum eða öxlum. Í afturhurðunum eru innbyggð sólskyggni sem er fyrirhafnarlaust að draga fyrir. Gott aðgengi er að Iso-Fix festingum í tveimur aftursætum.

Skotthlerinn er rafknúinn og er farangursrýmið með stærsta móti, eins og við er að búast í Skoda. Undir gólfinu er varadekk í fullri stærð. Þar sem gólfið er nokkuð neðarlega flúttir það ekki við skotthlerann eða aftursætin þegar þau eru lögð niður.

Eldsnögg sjálfskipting

Aksturseiginleikum bílsins er helst hægt að lýsa sem hefðbundnum. Fjöðrunin er þægilega mjúk og þar sem bíllinn er nokkuð hár fer hann fyrirhafnarlaust yfir flestar hraðahindranir. Veghæðin kemur jafnframt að góðum notum á malarvegum og slóðum þar sem hefðbundnir fólksbílar myndu lenda í vanda.

Bíllinn er fljótur að ná upp hraða og merkilega snöggur miðað við dísilbíl. Þar spilar sjálfskiptingin stórt hlutverk, en skiptingarnar eru eldsnöggar. Hljóðvistin er góð á hvaða aksturshraða sem er, en þar sem þetta er dísilbíll er alltaf smá titringur og ómur frá vélinni. Akstursaðstoðin skilar sínu vel og stýrir bíllinn og heldur fjarlægð frá næsta ökutæki af öryggi, nema í erfiðum aðstæðum eins og þegar ekið er inn í hringtorg.

Að lokum

Skoda höfðar með þessum bíl til þeirra sem vilja hefðbundna bíla með öllu sem flestir þurfa, miklu rými og engu kjaftæði. Sá jepplingur sem er sambærilegastur við þennan er Kia Sorento með dísilvél og er nánast ómögulegt að gera upp á milli þeirra.

Skoda Kodiaq með tveggja lítra dísilvél kostar frá 9.590.000 í Selection útgáfu, en það er sú útgáfa sem tekin var fyrir hér. Þar fyrir ofan eru Style og Sportline útgáfur með meira af staðalbúnaði. Þá er jafnframt hægt að fá tengitvinnbíla með 1,5 lítra bensínvél og 18 kílóvattstunda rafhlöðu. Dísilvélin er með 193 hestöfl, fjórhjóladrif og 2,3 tonna dráttargetu. Nánari upplýsingar fást hjá Heklu bílaumboði.