Syðri-Hofdalir
Bærinn Syðri-Hofdalir er staðsettur í Viðvíkursveit, austanvert í Skagafirði, 22 km frá Varmahlíð og einnig frá Sauðárkróki. Þar búa hjónin Klara Helgadóttir og Atli Már Traustason, ásamt hinum ýmsu öngum fjölskyldunnar.
Ábúendur: Klara Helgadóttir, Atli Már Traustason, Trausti Kristjánsson og Ingibjörg Aadnegard.
Fjölskyldustærð: Fjölskyldustærð er mjög teygjanlegt hugtak. Á Syðri- Hofdalatorfunni búa Atli og Klara ásamt Anítu Ýri, 21 árs, sem reyndar er í útlegð í Svarfaðardalnum hjá kærastanum, og Trausta Helga 16 ára, Trausti og Imba, Trausti Valur (bróðir Atla) ásamt Gunnhildi og fjórum börnum, Friðrik Andri (elsti sonur Atla og Klöru) ásamt Lilju Dóru og Veigari Má en þau búa í Fagraholti, sem er tekið út úr landi Syðri-Hofdala. Valla, frænka Atla, býr síðan fyrir ofan veg í Einholti.
Stærð jarðar: Syðri-Hofdalir eru um 300 ha þar af 100 ha ræktaðir. Einnig nytjum við jörðina Svaðastaði sem liggur að Syðri-Hofdölum en hún er um 1.200 ha, þar af 40 ræktaðir.
Gerð bús: Blandaður búrekstur, mjólkurframleiðsla, nautakjöts- framleiðsla, hrossarækt og sauðfjárrækt í meintri riðupásu.
Fjöldi búfjár: Um 80 mjólkurkýr auk uppeldis, 120 naut í eldi, alls um 300 nautgripir, 60 hross, sauðfé var um 700 við niðurskurð, tveir smalahundar og einn minkahundur.
Hvernig gengur hefðbundinn vinnudagur fyrir sig á bænum: Dagurinn hefst á mjöltum kl. 06. Um kl. 10 stormar Atli af stað í „vinnuna“ en hann dundar við að sinna þurfandi mjólkurkúm kollega sinna í firðinum. Önnur tilfallandi störf eftir árstíðum. Seinni mjöltum lýkur um kl. 20 en oft vill vinnudagurinn teygjast fram eftir.
Skemmtilegustu/leiðinlegustu bústörfin: Atla finnst jarðvinnsla skemmtilegust en trúlega er hann einn um þá skoðun. Sauðburður var ofarlega á listanum hjá yngri kynslóðinni. Leiðinlegast er að fást við bilaðar vélar og veikar skepnur.
Hvernig sjáið þið búskapinn fyrir ykkur á jörðinni eftir 5 ár: Fleiri kýr, meiri mjólk,100 kg meira meðalfall á nautum með tilkomu kyngreinds sæðis, aftur sauðfé og hver veit nema fjárfest verði í mjaltaþjónum.
Hvað er alltaf til í ísskápnum: Rjómi, lýsi og AB mjólk, annars er hann yfirleitt tómur ;)
Hver er vinsælasti maturinn á heimilinu: Grillað folaldakjöt, hvítlauksristaður humar, jólafrómasinn og hefðbundið lambalæri.
Eftirminnilegasta atvikið við bústörfin: Þegar ný fjárhús voru tekin í notkun árið 2004 og öll vinnan við sauðféð fór fram undir einu þaki í stað þess að vera á þremur jörðum. Einnig þegar nýja fjósið var tekið í notkun í mars 2019 og fyrstu dagarnir á eftir þegar halda þurfti á hverri kú inn í mjaltabásinn renna seint úr minni.
