Svínarækt undir miklu eftirliti

Ingvi Stefánsson, formaður deildar svínabænda hjá Bændasamtökum Íslands, segir notkun koltvíoxíðs við deyfingu svína vera viðurkennda aðferð út frá dýravelferðarsjónarmiðum.

Mbl.is greindi frá því í liðinni viku að sláturhús Stjörnugríss á Kjalarnesi noti gas við slátrun svína. Nokkur umræða hefur verið um málið í fjölmiðlum, eftir að Guardian birti myndbönd sem sýna svín líða miklar þjáningar í gasklefum í bresku sláturhúsi.

Ingvi leggur áherslu á að svínaræktin sé sú búgrein sem sé undir mestu eftirliti hérlendis, bæði á búum og í sláturhúsum. Dýralæknar frá Matvælastofnun séu alltaf í húsi við slátrun.

„Ég er alveg klár á því að þar fer allt fram eftir bókinni. Mér er ekki kunnugt um neinar kvartanir eða frávik sem viðkemur þessu hér á Íslandi. Það kæmi mér rosalega á óvart ef það væri einhver handvömm í gangi,“ segir Ingvi.

Hann telur líklegt að í sláturhúsinu í Bretlandi hafi eitthvert frávik átt sér stað. Gösunin þarf að fara fram með réttum styrk á réttum tíma og ekki sé sama hvernig staðið er að verkinu. „Einhver myndbönd utan úr heimi eru ekki endilega að gefa raunsanna mynd af því hvernig þetta fer almennt fram. Ég ímynda mér að þarna hafi eitthvað farið úrskeiðis – og það er auðvitað slæmt,“ segir Ingvi, en tekur fram að hann hafi ekki séð áðurnefnt myndband.

Kostir og gallar aðferða

Ingvi segir kosti og galla felast bæði í notkun rafstuðs og gasdeyfingar. Svín eru hjarðdýr og stressast upp þegar þau fara ein í rafskaut. Í gasklefunum eru þau fleiri saman og haldi meiri ró. Ingvi segist ekki vita til þess að til séu betri aðferðir til að slátra svínum.

Hann segir bagalegt að það sé gert að fréttaefni hér heima þegar einhverjum verði mislagðar hendur úti í hinum stóra heimi. Það sé ekki endilega hægt að heimfæra það á svínaræktina á Íslandi

Hérlendis eru fjögur svína­sláturhús. Þrjú af þeim notast við rafklemmur, á meðan sláturhús Stjörnugríss í Saltvík er útbúið gasklefum. Svínin eru sett í klefa sem fyllist af koltvísýringi. Þar missa þau meðvitund og eru þau blóðguð strax á eftir.