Sveitahúfa (Húfa á húsin)

Hugmyndir að uppskriftum og mynstrum koma víða að. Þessi húfa varð að stofni til við rölt á netinu, nánara útlit og úrtaka var hönnuð í samvinnu höfunda og litaval og samsetning þeirra einnig. Hugmyndir geta komið víða að, úr okkar nærumhverfi og því sem við notum dagsdaglega. Nú eru vinsælar svokallaðar ,,Lumber Jackets” eða skógarhöggsmannaúlpur. Kaflarnir í húfunni eru eins og á þeim mörgum og töff að eiga eins húfu og jakka. Það er því um að gera að líta í kringum sig til að fá hugmyndir, þær geta verið skammt undan og stundum þar sem síst má eiga von á þeim. Húfan er fljótprjónuð og alveg hægt að gera nokkrar og setja í jólapakka. Hún dugar vel í vetrarkuldanum þessi.

Ein stærð, fullorðins.

Auðvelt er að stækka eða minnka húfuna, hægt að nota stærri eða minni prjóna eða fjölga lykkjum eða fækka, en 8 lykkjur eru í hverju mynstri. Ef húfan á að vera grynnri, þá er einni mynsturlínu sleppt.

Efni og áhöld:
50 g tvöfaldur Þingborgarlopi í sauðalit og 2 litir litaður Þingborgarlopi, Slettuskjótt 50 g af hvorum. Með tvöföldu stroffi er húfan u.þ.b. 75 g að þyngd, þannig að aðeins þarf að bæta við aðallitinn til að eiga efni í tvær húfur.

4.5 mm og 6 mm 40 sm langir hringprjónar, 6 mm sokkaprjónar, saumnál til að ganga frá endum. Eins er hægt að nota lengri hringprjóna og nota „magic loop“ aðferðina alla leið.

Aðferð:
Húfan er prjónuð í hring. Þegar lykkjum fækkar eftir seinni úrtöku eru sokkarprjónarnir notaðir.

Fitjið upp 80 lykkjur á 4.5 mm hringprjóninn. Prjónið stroff 2 sléttar og 2 brugðnar 12 sm. Eins má stroff vera 1 slétt og 1 brugðin lykkja, allt eftir smekk. Svo er hægt að hafa stroffið einfalt og prjóna það 6 sm. Skiptið yfir á 6 mm hringprjóninn og prjónið mynstur eftir teikningu. Takið úr eins og sýnt er.

Þegar úrtöku er lokið er gengið frá í toppinn eins og lýst er á mynsturblaði.

Þvoið húfuna í höndunum með volgu vatni og mildri sápu, skolið með hreinu vatni og kreistið það vel úr og leggið til þerris.

Hér að neðan er dæmi um hversu vel húfan nýtist við leik og störf. Frágangur á kollinum er sýndur og ýmis tilbrigði að lit. Síðasta myndin er af jakka sem gaf höfundum hugmynd að mynstrinu.