Stunda blandaðan búskap með menningartengda ferðaþjónustu og matvælavinnslu

Hjónin Svavar Pétur Eysteinsson og Berglind Häsler búa á Karls­stöðum í Berufirði og stunda þar blandaðan búskap með menningu, matvælaframleiðslu og ferða­þjónstu undir vörumerkinu Havarí. 

 

Svavar Pétur er kunnur sem tónlistarmaðurinn Prins Póló og saman standa þau að margvíslegri starfsemi heima á bæ; meðal annars matvælavinnslu og menningartengdri ferða­þjónustu. Bulsur, grænmetispylsurnar þeirra, hafa tryggt sig í sessi á Íslandi og nýjasta afurð þeirra eru snakkflögurnar Bopp, sem er poppað bankabygg. 

 

Svavar Pétur Eysteinsson, bóndi á Karlsstöðum og matvælaframleiðandi, með Boppið – nýjustu afurð sína. 

 

Hafa prófað ýmislegt

 

Þau Svavar Pétur og og Berglind hafa reyndar prófað ýmislegt þegar kemur að grænmetisrækt og vinnslu á því. 

 

„Síðan við hófum búskap á Karlsstöðum árið 2014 höfum við stundað ýmiss konar ræktun á káli og rótargrænmeti. Um tíma framleiddum við nokkrar tegundir af snakki úr rófum, kartöflum og grænkáli en sú framleiðsla reyndist því miður mannaflsfrek og óarðbær. Þannig að við héldum áfram tilraunum með ný hráefni og vinnsluaðferðir. Markmiðið var alltaf að búa til snakk sem innihéldi nær eingöngu íslensk hráefni enda fannst okkur snakkhillur verslana skorta vörur úr íslensku hráefni,“ segir Svavar Pétur.  

 

„Sú vinna leiddi af sér þá vöru sem við kynnum nú til sögunnar en það er poppað bankabygg sem við köllum Bopp. Þetta er ekki ósvipað hrískökum en í staðinn fyrir hrísgrjón notum við lífrænt bankabygg frá Vallanesi sem er hágæða hráefni og einstaklega bragðgott. Boppið er svo saltað með vestfirsku sjávarsalti frá Saltverki. Þetta er því algjörlega íslensk landbúnaðarafurð – og lífrænt vottuð í þokkabót.

 

Hér var lítið fjós sem við tókum í gegn og breyttum í matvælavinnslu. Þar er Boppið framleitt,“ bætir Svavar Pétur við.

 

Ferðaþjónustan blómstrar

 

Að sögn Svavars Péturs er ferðaþjónustan á Karlsstöðum í miklum blóma.

 

„Hún vex ár frá ári. Við lögðum útihúsin undir gistingu og veitingaþjónustu og traffíkin er góð frá vori fram á haust. Við brjótum svo sumarið upp með menningardagskránni Sumar í Havarí sem hefur fætt af sér marga fjölbreytta viðburði og trekkir að fólk hvaðanæva að. Hér hafa verið haldin gallhörð sveitaböll, kabarettsýningar og bíó – og allt þar á milli. Á veturna drögum við fyrir og erum með annan fótinn í ýmsum verkefnum fyrir sunnan, en Boppið er framleitt á Karlsstöðum allt árið um kring.“

 

Bulsurnar í sókn

 

Margir þekkja grænmetis­pylsurnar Bulsur sem Havarí hefur framleitt frá 2013. Svavar segir áhugann hafa vaxið ár frá ári.

 

„Áhugi á grænkerafæði er mikill og margir neytendur velja auk þess Bulsurnar fram yfir aðrar sambærilegar vörur til að minnka kolefnissporið en þær innihalda að megninu til íslenskt bankabygg, líkt og Boppið. Það eru tímamót hjá Bulsunum um þessar mundir en Norðlenska ætlar að taka að sér framleiðslu á þeim. Það er mjög spennandi að fara með Bulsurnar norður enda er norðlensk framleiðsla framsækin og í miklum blóma,“ segir Svavar Pétur. 

 

Spurður hvort eitthvað fleira sé í matvælapípunum hjá þeim, segir hann: „Það verður gaman að sjá hvort Bulsurnar geti af sér einhver afkvæmi þegar þær fara norður.“