Stígum inn í haustið

Haustið er komið með öllum sínum þokka og í stað þess að bölva því að hafa ekki notið neins sumars þetta árið er lítið annað hægt í stöðunni en að njóta núverandi árstíma.

Með það hugarfar er réttast að kynna sér dulúðlega hausttískuna og hefja leikinn með því að stíga niður fæti í uppháum stígvélum, setja upp sólgleraugu og bera höfuðið hátt.

Margt er um að velja og eru tískuhönnuðir æ meðvitaðri um að gagnsæ framleiðsla, gæði og ending haldast í hendur þegar kemur að ákvörðunum neytenda, en í dag eru þeir sífellt fleiri sem kjósa fremur vörur sem fara á einn eða annan hátt vel með umhverfið. Hér eru dæmi um áhugaverðan skófatnað og gleraugu.

Krókódílamynstur eða ull upp á læri

Fyrst má nefna afar fögur upphá stígvél, dökkbrúnt eintak með krókódílamynstri sem ætti aldeilis að geta lífgað upp á sálartetrið í haustrokinu. Þau má fá hjá fyrirtækinu Alohas sem sérhæfir sig í nýtingu á endurunnu leðri svo og bæði epla-, kaktus- og kornleðri.

Vörurnar, sem eru unnar á Spáni og í Portúgal, hafa vakið eftirtekt, ekki síst fyrir þá sjálfbærnistefnu fyrirtækisins að vinna hverja pöntun þegar hún berst, en framleiða ekki í massavís eins og tíðkast víða. Fyrirtækið fylgir ströngum kröfum samfélagslegrar ábyrgðar, setja velferð starfsmanna sinna efst á lista og segjast leggja áherslu á að taka lítil en stöðug skref að frekari framförum.

Fyrirtækið VIVAIA, sem er með höfuðstöðvar í London, kemur skemmtilega á óvart með hönnun sinni.

Þau framleiða meðal annars vatnsheld „ullarstígvél“ ef svo má kalla – sem ná yfir hné og segja hönnuðirnir stígvélin bæði sjálfbær og þægileg auk þess sem eigandinn þarf ekki að hafa áhyggjur af táfýlu.

Stígvélin eru í raun prjónles með sóla, en hönnuðirnir nýttu endurunnar plastflöskur sem áður höfðu verið sjávarúrgangur og unnu úr þeim teygjanlegan þráð sem minnir á ull.

Samkvæmt umsögnum kaupenda eru stígvélin afar þægileg, svipuð notalegum ullarsokkum sem ná alveg upp á læri og geta teygt sig yfir flestar lærastærðir.

VIVAIA framleiðir einnig innlegg í skóna úr jurtinni Artemisia Argyi, sem gefa góða höggdempun og síðast en ekki síst er hægt að handþvo stígvélin, enda vatnsheld.

Gaman er að nefna að sumum skópörum VIVAIA má hreinlega henda í þvottavélina og geri nú aðrir betur.

Fyrir karlpeninginn

Rúskinnsstígvél fyrir karlmenn má svo til dæmis finna hjá Will‘s Vegan store (bæði í London og á netinu) sem sérhæfir sig í gæðavarningi frá Ítalíu og Portúgal.

Á vefsíðu þeirra kemur fram að það leður og rúskinn sem notað sé í vörur þeirra sé unnið að mestu úr maísplöntum sem ekki eru ætlaðar til manneldis og beinir því ekki neysluhæfum afurðum frá birgðakeðjum manna eða dýra.

Will‘s Vegan store býður einnig upp á vörur ætlaðar konum, börnum og svo til heimilisins, en öll hönnun fyrirtækisins og framleiðsla er sjálfbær og dregur úr neikvæðum umhverfisáhrifum.

Sólgleraugu sem gera allt betra

Sólgleraugu fyrir haustið má til að mynda finna á vefsíðu fyrirtækis sem ber það áhugaverða nafn Humps Optics. Þar er lögð áhersla á að kaupandinn geti keypt sér sólgleraugu á hagstæðu verði með sama gæðastimpli og þau gleraugu sem eru þrefalt dýrari.

Boðið er upp á lífstímaábyrgð á áðurnefndum gleraugum auk þess sem ef verslað er yfir 99$, eða rúmar tólf þúsund krónur, er heimsending ókeypis. Rétt er að geta þess að eitt par af sólgleraugum kostar frá 5.000 krónum og mikið úrval er í boði af skemmtilegum týpum.

Einnig er boðið upp á afsláttarpakka, þannig nú er um að gera að styrkja gott málefni.

Fyrir utan það að bjóða vörur á ákjósanlegu verði fer nefnilega hluti ársgróða Humps Optics til fyrirtækis sem kallast RestoringVision, en þeir eru þekktir fyrir að útdeila ókeypis lesgleraugum sem víðast um þróunarlöndin.

Forsvarsmenn Humps Optics hafa einnig farið sjálfir í slíkar ferðir, og eins og staðan er núna, afhent tæplega 200 þúsund lesgleraugna til þeirra sem á þurfa að halda.