Sterkur landbúnaður þarf stefnufestu og aftur stefnufestu
Það er stór ábyrgðarhluti stjórnvalda að reyna að tryggja að atvinnugreinar séu byggðar upp á landsbyggðinni með það að markmiði að þar haldist nægilega sterk byggð til að hin félagslega heild samfélagsins haldi velli.
Ef þetta verður ekki gert og stjórnvöld gefast upp á að verja byggðirnar með nýjum atvinnugreinum, þá er hætta á að Ísland sé í verulegri hættu með að verða borgríki.
Sú atvinnugrein sem hefur haldið landinu í byggð í meira en 1100 ár stendur á bjargbrúninni þar sem stjórnvöld hafa ekki tryggt nýliðun, afkomuöryggi né rekstrarumhverfi bænda en hafa þess í stað aukið íþyngjandi kröfur á íslenskan landbúnað jafnt og þétt með gullhúðun EES- reglna. Það er algjörlega ótækt að bændur landsins búi við þá stöðu að stjórnvöld skerði samkeppnisstöðu bænda landsins með því að búa svo um hnútana að bændum er ætlað að starfa undir mun strangara og íþyngjandi regluverki en erlendir samkeppnisaðilar sem virðast geta ótakmarkað flutt inn matvæli til landsins. Fyrir hverja hafa stjórnvöld verið að vinna? Innflutningur á nautakjöti var árið 2023 samtals 1.344 tonn þrátt fyrir að úthlutað magn tollkvóta fyrir sama ár var einungis 800 tonn.
Nei, nú er nóg komið
Það er mín von að þjóðinni auðnist sú gæfa að skynja að við stöndum á tímamótum í komandi alþingiskosningum. Stefna Miðflokksins hefur frá upphafi verið og er enn „Ísland allt“ sem er heildstæð byggðastefna fyrir landið allt sem byggir meðal annars á aðgerðum til að byggja upp sterkan og sjálfbæran landbúnað sem tryggir matvæla- og fæðuöryggi þjóðarinnar til framtíðar. Stöðva verður innflutning á ófrosnu kjöti, eggjum og ógerilsneyddum matvælum. Vísindamenn hafa ítrekað bent á mikilvægi innlendrar matvælaframleiðslu m.a. með hliðsjón af fjölgun sýklalyfjaónæmra baktería. Tryggja þarf landbúnaði sem atvinnugrein skýrt starfsumhverfi og langtímasýn byggða á traustum grunni og stefnufestu. Bújörð sem leggst af hefur langtímaáhrif og tækifæri sem ekki eru nýtt tapast hratt ef ekki eru til staðar möguleikar að grípa þau. Miðflokkurinn hefur ávallt talað fyrir mikilvægi þess að stórefla innlenda matvælaframleiðslu, tryggja matvæla- og fæðuöryggi, veita neytendum umhverfisvæna, holla og næringarríka fæðu, treysta afkomu bænda, auka sjálfbærni og umhverfisvernd, varðveita þekkingu, efla rannsóknir og menntun í landbúnaði, auka skilning á mikilvægi landbúnaðarframleiðslu og verndun landgæða.
Í 1100 ár hefur íslenskur landbúnaður bæði fætt og klætt þjóðina, hér hefði ekkert byggst upp án landbúnaðar og fólksins sem staðið hefur vaktina í áranna rás.
En með óbreyttu stjórnarfari mun Ísland verða borgríki í sinni svörtustu mynd og landsbyggðin ein frístundasvæði erlendra auðmanna.
Miðflokkurinn mun vinna að lausnum sem byggja á raunverulegum aðgerðum til að ryðja veg nýliðunar í landbúnaði og byggja upp sterkan landbúnað. Miðflokkurinn vill tryggja að ljós útihúsa í sveitum landsins munu lýsa um ókomna tíð Íslandi öllu til heilla.
Undirrituð mun fjalla nánar um þær hugmyndir í næsta tölublaði Bændablaðsins.
