Stefnir í met í kynbótasýningum

Mikil spenna ríkir fyrir kynbótasýningar á Landsmótinu á Hellu sem hefst um mánaðamótin. Sýningar vorsins fóru fremur rólega af stað en það breyttist heldur betur og gera má ráð fyrir glæsilegum kynbótasýningum á mótinu. Um 80 hross hafa í vor náð 8,50 eða hærra í einkunn fyrir hæfileika og þar af fóru 11 hross yfir 8,80 í einkunn. Þá stefnir í metfjölda í kynbótasýningum á Hellu.

Eyþór Einarsson, ráðunautur hjá Ráðgjafarmiðstöð landbúnaðarins, mun sinna störfum yfirdómara í kynbótadómum á komandi Landsmóti hestamanna. „Það stefnir allt í mjög sterka kynbótasýningu á landsmóti og mjög fjölmenna, líklega verður met slegið í fjölda kynbótahrossa. Alls hafa 281 hross náð lágmarkseinkunn inn á mótið, 101 stóðhestur og 180 hryssur. Auðvitað falla alltaf einhver hross út af ýmsum ástæðum, meðal annars vegna þess að þeim verður teflt fram í gæðingakeppninni. Það má samt búast við að flest þau hross sem náð hafa lágmarkseinkunn mæti til dóms nú. Mestur fjöldi kynbótahrossa sem hafa komið til dóms á landsmóti var á mótinu á Hellu árið 2004 en þá voru sýnd 244 hross. Ég býst við því að það met verði slegið nú.“

Eyþór segir skýringar á þessari fjölgun geta verið ýmsar, meðal annars hafi nú verið sett lægri lágmörk fyrir klárhross en alhliðahross. „Síðan má nú bara ætla að ræktunin sé að skila árangri og góðum hrossum sé einfaldlega að fjölga.“

Hæst dæmda hrossið eftir kynbótasýningar vorsins er Arion frá Eystra-Fróðholti, 7 vetra gamall klár undan Glettu og Sæ frá Bakkakoti. Arion hlaut 8,91 í aðaleinkunn og 9,25 fyrir hæfileika. Aðeins einn hestur hefur áður hlotið hærri dóm en það er gæðingurinn Spuni frá Vesturkoti sem á sínum tíma hlaut einni kommu hærri aðaleinkunn eða 8,92 og sömu einkunn og Arion fyrir hæfileika.

Daníel með 33 hross

Sýnandi Arions er Daníel Jónsson sem mun hafa í nægu að snúast á mótinu en hann sýnir 33 hross. Þó er ekki útilokað að einhverjar breytingar verði á mótinu sjálfu hvað varðar knapa því auðvitað er mikið lagt á menn að sýna slíkan fjölda.

Ekki liggur fyrir að svo stöddu hvaða hestar verða sýndir með afkvæmum á mótinu að sögn Eyþórs. „Nú verður kynbótamatið uppreiknað eftir dóma vorsins og að því loknu verður spennandi að sjá hvaða hestar ná lágmörkum þar og hvernig þeir raðast til fyrstu verðlauna og heiðursverðlauna fyrir afkvæmi.“