Sóknarmöguleikar sem verðskulda athygli og uppbyggingu
Höfundur: Guðrún Hulda Pálsdóttir
„Mér finnst ég standa inni í málaflokki sem er bæði tengdur sterkt inn í fortíð en er alveg nauðsynlegur inn í framtíð,“ segir Svandís Svavarsdóttir, nýr matvæla-, sjávarútvegs- og landbúnaðarráðherra. Hún er að vonum spennt fyrir nýju hlutverki.
„Þetta eru málaflokkar sem kallast mjög á við söguna og ræturnar en eru um leið málaflokkar sem er algjör nauðsyn inn í loftslagsverkefnin og framtíðarhugsun okkar um hágæðamatvælaframleiðslu, fæðuöryggi og matvælaöryggi.“
Svandís ól manninn að einhverju leyti í dreifbýlinu, var oft í sveit á sumrin og á minningar um bústörf bæði af Ströndum og við Breiðafjörð.
„Ég kynntist hefðbundnum búskap að fornum sið á Litla-Fjarðarhorni í Kollafirði, þar var handmjólkað og skilvinda í búrinu. Svo kynntist ég eyjabúskap bæði á Staðarfelli á Fellsströnd og Dröngum á Skógarströnd. Þar snerist búskapurinn ekki bara um hefðbundnar greinar, heldur líka um að lifa af landsins gæðum, tína egg og dún, veiða gæs, lunda og sel,“ segir Svandís sem er ættuð úr Borgarfirði, Breiðafirði, Dalasýslu og af Ströndum.
Finnur fyrir ofsalega miklum sóknarmöguleikum
Landbúnaðarkafli Stjórnarsáttmálans er í tíu liðum og leggur áherslu á að tryggja fæðuöryggi í landinu með öflugri innlendri matvælaframleiðslu, þ.m.t. tækifæri í grænmetisræktun og lífrænum landbúnaði.
„Það sem mér finnst skipta mestu máli er að finna fyrir þessum miklu sóknarmöguleikum sem eru til í landbúnaði. Þar eru heilmargir sprotar sem hafa verið að láta á sér kræla og verðskulda athygli og uppbyggingu í matvælaframleiðslu og framleiðslu henni tengdri. Fæðuöryggi og matvælaöryggi skiptir sífellt meira máli, við höfum ekki síst verið minnt á það í faraldrinum. Þegar öllu er á botninn hvolft skiptir miklu máli að búa við sjálfbærni í matvælaframleiðslu. Það spilar líka saman við orkunotkun, loftslagsmál og að draga úr kolefnisspori.“
Þá séu áherslur nýs landbúnaðarráðherra óhjákvæmilega afar grænar.
„Það liggja tækifæri í auknu samstarfi með greininni varðandi samdrátt í losun gróðurhúsalofttegunda. Það tengist minni sýn á málaflokkinn, áherslum ríkisstjórnarinnar og þeirri staðreynd að ég kem úr grænu baklandi. Mér finnst mikilvægt að áherslan á loftslagsmál og náttúruvernd haldist í hendur við landbúnað.“
Málefni skógræktar og landgræðslu færast undir ráðuneyti Svandísar.
„Bæði er um að ræða mjög mikilvæga þætti sem lúta að tækifærum til að binda kolefni og okkar áætlanir í loftslagsmálum eru með áherslu á skógrækt og landgræðslu. Það skiptir máli að þau verkefni séu unnin í sátt og samráði við þau sjónarmið sem lúta að náttúruvernd og vistheimt annars vegar og hins vegar þau sjónarmið sem snúast um byggð í landinu. Þetta er vandratað einstigi sem þarf að passa vel upp á.“
