Söfnum söfnum í sumar

Nú er sumarið að koma og eflaust mörg sem ætla sér að njóta þess að vera í sumarfríi og ferðast um landið, heimsækja vini og ættingja eða skoða nýjar slóðir. Þegar ferðast er um landið má víða finna spennandi söfn, setur og sýningar, sem höfða vel til ólíkra hópa og fólks á öllum aldri.

Söfnin í landinu eru auðvitað gífurlega fjölbreytt. Minja- og byggðasöfn má finna víða, auk lista- og náttúrugripasafna og margvíslegra sýninga. Sjálf hef ég reynt að vera dugleg að heimsækja söfn, bæði þau söfn, gömul og ný, sem ég hef ekki skoðað áður og svo er ég fastagestur á öðrum. Mörg söfnin eru síbreytileg og þar eru reglulegar settar upp nýjar og spennandi sýningar. Auk þess finnst mér að þó ég sé að skoða sama safnið kannski í tíunda skiptið, sé ég alltaf að rekast á eitthvað sem ég hef ekki tekið eftir áður, alltaf að læra eitthvað nýtt.

Ég hef líka alltaf verið safnari sjálf og safnað furðulegustu hlutum yfir ævina. Sem barn átti ég gríðarstórt sælgætissafn og svo safnaði ég um tíma töppum af gosflöskum. Ég eyddi svo löngum tíma í að telja og flokka bæði nammi og tappa.

Þegar ég eltist og flutti að heiman hafði ég svo ekki lengur pláss fyrir allt þetta dót. Nú safna ég fyrst og fremst upplifunum, eins og svo margir Það er svo gaman að upplifa nýja hluti, ferðast og njóta, skoða og snerta og prófa og vera með í alls konar ævintýrum.

Það getur hins vegar reynst erfiðara að hafa yfirlit yfir það safn, kannski helst með því að vera dugleg að taka myndir og miðla þeim.

Nú nýverið opnaði vefurinn www.sofn.is. Þar er listi yfir söfn, setur og sýningar á Íslandi, sem hægt er að heimsækja og skoða.

Hægt er að skrá sig inn á vefinn og merkja við þá staði sem fólk hefur heimsótt og þá um leið sést hverja á eftir að skoða. Sjálf hef ég heimsótt 44% þeirra, samkvæmt vefnum, og samkvæmt kortinu er augljóst að ég hef verið duglegust að skoða söfn á Vestfjörðum. Mér sýnist ég hins vegar hafa góða ástæðu til að heimsækja Norðurlandið í sumar, til að ná að merkja við fleiri staði.

Það er skemmtileg áskorun að safna söfnum, setrum og sýningum í sumar og ég hvet ykkur til að taka þátt í henni með mér!

Það má gjarnan merkja myndir sem teknar eru á söfnum með #söfnumsöfnum og ef einhver hefur afrekað að heimsækja þau öll, má svo gjarnan hafa samband og láta okkur vita. Allar nánari upplýsingar um það má finna á vefnum.

Góða safna-skemmtun í sumar!