Skýrsluhald í sauðfjárrækt: Óvenju vænir dilkar og hæsta meðaleinkunn fyrir gerð
Niðurstöður úr skýrsluhaldi sauðfjárræktarinnar liggja nú fyrir um síðasta ár og þar ber hvað hæst að vænleiki dilka var frábær síðasta haust, auk þess sem meðaleinkunn fyrir gerð var sú hæsta á landsvísu frá því að núverandi kjötmat var tekið í notkun.
Í yfirliti ráðunauta Ráðgjafarmiðstöðvar landbúnaðarins, Árna B. Bragasonar og Eyþórs Einarssonar, kemur fram að framleiðsluárið 2025 hafi verið ákaflega hagstætt að mörgu leyti. Meðalafurðir eftir hverja á voru 28,98 kíló sem er aðeins meira en árið á undan, en aðeins minna en árið 2021 þegar þær voru 29,46 kíló en það var metár.
Áhrif á afurðir frá 2024
Segja þeir einhverja bændur hafa búist við enn meiri afurðum í slíku árferði, en ástæðu þess að svo varð ekki megi líklega rekja til ótíðar ársins 2024 sem hafi haft áhrif á ástand ánna og fóðurforðann sem lagt var af stað með inn í framleiðslu ársins 2025.
Þróunin sé þó sú að afurðir hafa aukist á síðustu árum sem og holdfylling lambanna. Ekki séu áberandi merki þess að áhersla á innleiðingu verndandi arfgerða dragi þar úr framförum.
Áfram megi bæta árangur í flestum eiginleikum en sérstaklega þyrfti að ná árangri í því að fjölga lömbum til nytja.
Hæsta einkunnin á Syðri-Urriðaá
Samkvæmt niðurstöðum var búsmeðaltal fyrir fallþunga 17,7 kg, einkunn fyrir gerð 9,65 og einkunn fyrir fitu 6,79 og er byggt á upplýsingum um rúmlega 374 þúsund sláturlömb. Meðaltal fyrir þunga hækkar um 300 grömm milli ára, gerðin um 0,16 og fitan um 0,24.
Hvað varðar gerðareinkunn er efsta bú landsins Syðri-Urriðaá í Miðfirði með einkunn upp á 12,89 við 23,5 kílóa fallþunga. Segja þeir að um athyglisverðan árangur sé að ræða þar sem verið sé að byggja upp nýja hjörð eftir fjárskipti og lömbin því eingöngu undan ungum ám. Greinilegt sé að vel hafi tekist til við val á gimbrum og meðferð lambanna framúrskarandi.
Í yfirliti þeirra Árna og Eyþórs segir að búum sem ná 40 kílóum eða meira eftir hverja fullorðna á fjölgi hægt en örugglega og eins. Líkt og árið 2024 eru það níu bú sem ná þessum árangri. Kaldbakur á Rangárvöllum er afurðamesta búið með 45 kíló eftir ána. Í öðru sæti eru Efri-Fitjar í Fitjárdal með 44,2 kíló , í þriðja sæti er Gýgjarhólskot í Biskupstungum með 44,1 kíló og í fjórða sæti er Kiðafell í Kjós með 43,1 kíló.
