Skráning afurðatjóns vegna COVID-19
Á Bændatorginu er nú hægt að skrá afurðatjón bænda og ferðaþjónustuaðila í sveitum undir liðnum „Afurðatjón bænda v. COVID-19.“ Þar er unnt að skrá það tjón sem bændur telja sig hafa orðið fyrir og rekja má til veirunnar. Hægt er að skrá afurðatjón, kostnað vegna breytinga á vinnuliðum, vegna heimaveru starfsfólks, tapaðar gistinætur o.fl.
Skráningarnar verða notaðar til að leggja mat á það tjón sem bændur kunna að verða fyrir og í framhaldinu til að sækja fjármagn til þess að koma til móts við það. Ekki hafa fengist nein vilyrði fyrir því að bændur fái tjón bætt en þeir eru engu að síður hvattir til þess að halda skráningum til haga.
Ef spurningar vakna þá vinsamlegast hafið samband við ráðgjafa Ráðgjafarmiðstöðvar landbúnaðarins, RML, sem mun halda utan um skráningarnar. Síminn hjá RML er 516-5000 og netfangið er rml@rml.is.
