Skipulagsbreytingar hjá Bændasamtökunum
Stjórnendur Bændasamtakanna kynntu starfsfólki og aðildarfélögum sínum um skipulagsbreytingar í gær, miðvikudag. Í tilkynningu á vef samtakanna var greint frá því að tölvudeild BÍ, sem sér um rekstur tölvukerfa og forritaþróun, muni færast yfir til Ráðgjafarmiðstöðvar landbúnaðarins (RML) um næstu áramót. Á sama tíma verður fjármálasvið samtakanna sameinað skrifstofurekstri Hótels Sögu sem er dótturfélag BÍ líkt og RML.
Hagræðing og samlegðaráhrif
Að sögn stjórnenda BÍ er tilgangur breytinganna er að leita hagræðingar og samlegðaráhrifa í rekstri samtakanna og dótturfélaga. „Ástæðurnar eru einkum breyttar aðstæður í rekstri sem öll aðildarfélög BÍ, sem áður nutu tekna af búnaðargjaldi, eru að fást við. Fjármálaumsýsla samtakanna, þ.e. bókhald, reikningagerð, launagreiðslur og önnur tengd verkefni, mun eftir breytinguna fara fram í sameinaðri deild sem sinnir slíkum verkefnum fyrir samtökin og dótturfélög þeirra; Hótel Sögu, Bændahöllina og Nautastöð BÍ (NBÍ ehf.). Fjármáladeild Hótels Sögu mun yfirtaka gildandi samninga sem BÍ hefur gert um bókhaldsþjónustu við aðra,“ segir í tilkynningu BÍ.
Þá segir að tölvuþjónusta BÍ og ráðgjafarstarf RML séu nú þegar tengd nánum böndum. „Með því að sameina þá starfsemi hjá RML liggja tækifæri í að efla starfsemina í heild. Ráðgjafarstarfið byggir ekki síst á upplýsingum úr skýrsluhaldi bænda og markvissri þróun tölvukerfa í samvinnu við notendur. Mikil framþróun er í tæknilausnum í landbúnaði og ráðgjafarstarf bænda þarf að nýta þá möguleika sem í því felast. Félagsmenn í BÍ munu áfram njóta sérkjara á forritum eins og verið hefur.“
BÍ líkari öðrum hagsmunasamtökum
Í lok tilkynningarinnar er sagt að eftir breytingarnar verði BÍ líkari öðrum hagsmunasamtökum í atvinnulífinu sem hafi hagsmunabaráttu og kynningarstarf að aðalmarkmiði. „Vissulega mun það taka einhvern tíma að aðlagast breytingunum en það er sannfæring stjórnar og framkvæmdastjóra BÍ að sú leið sem nú er farin eigi eftir að koma vel út fyrir félagsmenn samtakanna. Takmarkið er að verkefnin standi sterkari á eftir, bæði öflugri þjónusta við bændur og hagsmunabarátta,“ segir í tilkynningu BÍ.
