Skipa starfshóp um áhrif innflutnings

Skipa á starfshóp til að greina áhrif af hugsanlegum innflutningi á erfðaefni úr erlendu mjólkurkúakyni á íslenska mjólkurframleiðslu samkvæmt tillögu sem samþykkt var á deildarfundi kúabænda.

Alls voru 45 tillögur afgreiddar frá fundinum. Samþykkt var tillaga um helstu áherslumál nautgripabænda við gerð nýs búvörusamnings, sem eru að viðhalda núverandi framleiðslustýringakerfi, að megnið af stuðningnum verði áfram framleiðslutengdur, að stórauka fjármagn í samningana, auka tollvernd, að fjármagn fari ekki úr nautgripasamningnum í önnur málefni, að hagræðingarkrafa verði tekin út og fleira.

Þá var því beint til stjórnar BÍ að tengja áherslumál búvörusamninganna við umræðuna um fæðuöryggi og að aðgerðir og áherslumál bænda séu loftslagsvænar.

Vilja hefja vinnu við verndaráætlun

Skorað er á ríkisstjórn Íslands að tryggja fæðuöryggi í landinu með því að til séu nægar birgðir þeirra aðfanga sem eru nauðsynlegar til að halda landbúnaði í landinu gangandi í að lágmarki sex mánuði.

Stjórnvöld eru hvött til að hefja þegar vinnu við verndaráætlun fyrir íslenska mjólkurkúakynið. Lagt var til að gerð verði samanburðarrannsókn á íslensku nautgripakjöti og innfluttu erlendu nautgripakjöti er varðar eiturefni þungamálma og efnainnihald og einnig að rannsókn yrði gerð á heilnæmi íslenskrar mjólkur með tilliti til mjólkuróþols. Þá er stjórn NautBí gert að beita sér fyrir að fá upprunavottunina PDO og/eða PGI á mjólkurvörur framleiddar úr mjólk úr íslenska kúakyninu.

Standa á vörð um landbúnaðarland

Þá er skorað á sveitarfélög í dreifbýli að standa vörð um að gott landbúnaðarland verði ekki tekið úr landbúnaðarnotkun. Einnig voru samþykktar tillögur sem fjalla um afleysingar í landbúnaði, lánsfé til jarðakaupa, nýliðun, tryggingamál og tollvernd, heimavinnslu og heimaslátrun, upprunamerkingar, og fullvinnslu hliðarafurða.

Félagsmenn Bændasamtakanna geta nálgast samþykktar tillögur og rökstuðning með þeim á Mínum síðum á bondi.is.

Breytingar urðu á stjórn NautBÍ. Bessi Freyr Vésteinsson fór úr stjórn en í hans stað var Sigrún Hanna Sigurðardóttir kjörin í stjórn. Aðrir stjórnarmeðlimir voru endurkjörnir en það eru Sigurbjörg Ottesen, Reynir Þór Jónsson og Jón Örn Ólafsson. Erla Rún Guðmundsdóttir, Atli Már Traustason og Davíð Logi Jónsson voru kjörin í varastjórn.