Saumuðu tuskur úr ónýtum handklæðum fyrir þvottahús
„Þetta var mjög skemmtilegt og gefandi. Það er alltaf gaman þegar hægt er að finna verkefni fyrir nemendur þar sem þeir geta notað styrkleika sína og blómstrað,“ segir Birna Guðrún Baldursdóttir, iðjuþjálfi í Glerárskóla. Skólinn átti í vetur samstarf við þvottahús dvalarheimilanna á Akureyri, sem fólst í því að búa til tuskur úr ónýtum handklæðum.
Hugmyndin að verkefninu kviknaði á liðnu hausti þegar starfsfólk þvottahússins fékk þá hugdettu að fá einhvern til liðs við sig að útbúa tuskur úr handklæðum sem lokið hefðu hlutverki sínu sem slík. Haft var samband við Birnu iðjuþjálfa og grennslast fyrir um hvort hennar krakkar væru klár í slaginn.
Það voru þau vissulega en kórónuveiran setti strik í reikninginn um skeið í vetur. Rykinu var dustað af hugmyndinni á vordögum og tveir hæfir drengir úr hópnum, þeir Aron Máni Arnarsson og Arnar Máni Jörgensson, fengnir til verksins.
Drengjunum var boðið upp á veitingar á Hlíð að lokinni afhendingu á tuskunum. Þarna sitja þeir til borðs með Birnu, Friðnýju Sigurðardóttur, forstöðumanni stoðþjónustu á Hlíð, og Rögnvaldi en standandi eru Sigurborg Hreinsdóttir og Nedeljka Ostojic, starfsmenn þvottahússins. Mynd / Ásta Júlía Aðalsteinsdóttir
40 tuskur afhentar
Þeir komu sér upp aðstöðu í skólanum, settu þar upp saumastofu sem hlaut hið skemmtilega nafn Hálfmáninn. Þar unnu þeir baki brotnu og afraksturinn, um 40 tuskur, var afhentur við hátíðlega athöfn á þvottahúsinu.
Birna segist ekki sjá þetta endilega sem stakt verkefni heldur eitthvað sem hægt verði að vinna áfram með á næsta skólaári.
„Það eru stundum einhver verkefni í samvinnu við fyrirtæki og stofnanir í bænum innan skólans en við mættum örugglega vera duglegri að sjá tækifæri í því og grípa þau,“ segir hún.
