Samstaðan mun halda
Fyrir tveimur árum náðist stór áfangi í hagsmunabaráttu bænda þegar Bændasamtökin urðu sameinuð.
Búgreinafélög hinna fjölbreyttu greina landbúnaðarins urðu þá formlega hluti samtakanna. Eins og gengur og gerist þarf að yfirstíga ýmsar hindranir í svo stórri aðgerð. En árið 2023 hefur verið árið þar sem sameiningin hefur óumdeilanlega skilað árangri. Og ekki hefur veitt af þegar sótt er að atvinnugreininni úr öllum áttum. Ef það eru ekki aðfanga- eða vaxtahækkanir þá er það krafa um meiri innflutning, kröfur frá EES, meiri kröfur með blýhúðun og inn á milli pólitískar ákvarðanir. Fyrir samtökin og hagsmunagæslu landbúnaðarins hefur það verið lykilatriði að hafa gott fólk í brúnni, á skrifstofu samtakanna sem er reiðubúið að berjast fyrir heildarhagsmunum landbúnaðarins.
Íslensk matvælaframleiðsla og íslenskur landbúnaður eru í fremstu röð, hvort heldur er um að ræða kjöt, fisk, mjólkurafurðir, grænmeti, nú eða jólatré! Hér á landi er nægt jarðnæði og mikið af hreinu vatni, þess vegna viljum við nýta landið undir framleiðslu sem við sem þjóð getum verið stolt af. Þó veður séu válynd hérna heima þá hafa bændur aðlagað sig að þeim aðstæðum. Kaldara loftslag hefur líka sína kosti þó það takmarki líka möguleikana. Við getum þó öll verið sammála um að það sé skynsamlegt að framleiða matvæli á Íslandi, þó ekki væri nema vegna sjónarmiða um sjálfsaflahlutfall þjóðarinnar í fæðuframleiðslu – fæðuöryggi þjóðarinnar. Framleiðsluvirði íslenskra landbúnaðarafurða er líka verulegt, eða um 90 milljarðar, og atvinnugreinin skapar yfir 10.000 störf, það munar um minna.
Einn besti mælikvarðinn á hversu vel hefur tekist til í hagsmunagæslu bænda og með sameiningu Bændasamtakanna er að þessa dagana er reynt að reka fleyg í þá samstöðu sem hefur skapast meðal okkar. Nú síðast með aðgerðum ríkisstjórnarinnar á grunni vinnu ráðuneytisstjórahópsins. Þar hefði stjórnvöldum farnast betur á því að ráðfæra sig við Bændasamtökin til að útfærslan og aðgerðirnar væru í samræmi við þá alvarlegu stöðu sem er í landbúnaði, og greiningar samtakanna og hópsins hafa leitt í ljós.
Afkomuvandi bænda hefur nú verið viðurkenndur og á honum bera stjórnvöld ábyrgð lögum samkvæmt. Fyrst aðeins hluti vandans verður leiðréttur með aðgerðum ráðuneytisstjórahópsins, þá verður að leysa afganginn eftir öðrum leiðum. Endurskoðun búvörusamninga er opin og ekkert því til fyrirstöðu að stjórnvöld komi þar með ásættanlegar lausnir að borðinu. Við sem höfum verið valin til að leiða hagsmunabaráttu bænda erum boðin og búin að finna lausnir með stjórnvöldum, svo lengi sem við heyrum ekki í öðru hverju orði að ekkert sé hægt að gera. Aðgerðir ríkisstjórnarinnar á dögunum sýna nefnilega og sanna að ýmislegt er hægt ef viljinn er fyrir hendi.
Við sem störfum við íslenskan landbúnað getum verið stolt, þrátt fyrir að verkefnið sé á stundum vanþakklátt og verkin erfið. Okkur hefur á þessu ári tekist að skapa öflugan meðbyr með atvinnugreininni því við erum samstíga og samheldin í hagsmunabaráttu okkar fyrir lífi okkar og atvinnu.
Kæru bændur og búalið, um leið og ég óska ykkur gleðilegrar hátíðar vil ég halda þeirri einörðu skoðun minni á lofti að það er samstaðan sem mun skila okkur í endamarkið. Með samstöðu höfum við fengið fyrir sjónarmið bænda og náð fram hluta þeirrar leiðréttingar sem þörf er á, og saman munum við ná fram leiðréttingu á kjörum bænda.
Áfram íslenskir bændur.
