Samkeppni um hönnun lopapeysu fyrir kvenbændur

Árið 2026 er alþjóðlegt ár kvenbóndans en af því tilefni hefur Uppspuni í Ásahreppi efnt til samkeppni meðal áhugasamra prjónara og hönnuða. Markmiðið er að hanna íslenska lopapeysu til heiðurs konum í bændastétt landsins.

Hulda Brynjólfsdóttir í Uppspuna fer fyrir verkefninu. „Vegna ársins 2026, sem Sameinuðu þjóðirnar hafa tileinkað „KVENBÆNDUM“ heimsins fannst okkur tilvalið að láta bera meira á okkur kvenbændum með því að gera eitthvað af þessu tilefni. Það lá beinast við að láta hanna lopapeysu úr íslenskri ull, því hvað hafa ekki kvenbændur gert mest af í gegnum tíðina? Jú, fyrir utan að rækta og hirða skepnur til sveita, þá held ég að það sé að vinna ull og prjóna úr henni og þannig halda hita á íslensku þjóðinni. Þannig að þetta er bæði gert fyrir íslensku ullina og bændurna,“ segir Hulda.

Allir geta tekið þátt

Geta allir verið með eða er einhver sérstakur markhópur? „Já, já, allir geta verið með og við höfum einnig auglýst þetta á erlendum samfélagssíðum, þannig að það eru ekki bara Íslendingar sem mega taka þátt. En peysan á að vera fyrir kvenbændur, bæði á Íslandi og úti um allan heim. Svo að allir sem eru að prjóna eða hanna lopapeysur eru hvattir til að taka upp prjónana og skila inn í keppnina. Það er mikill áhugi og verðlaunin eiga eftir að verða vegleg,“ segir Hulda. 

Reglur keppninnar

Nokkrar reglur fylgja keppninni en peysan verður að vera íslensk lopapeysa, hún á að vera fyrir konur og hún skal unnin úr íslenskri ull. Garn frá Uppspuna er æskilegt en er ekki skylda en íslensk framleiðsla og íslensk ull er skilyrði.

Upplýsingum um prjónara skal skilað með peysunni og drögum að uppskriftinni í lokuðu umslagi, þar sem nafnleynd verður fyrir dómarana, til Huldu Brynjólfsdóttur í Uppspuna fyrir 1. júní 2026. Uppskriftin þarf ekki að vera fullunnin og það má sömuleiðis fá frekari upplýsingar hjá Huldu á netfanginu huldauppspuni[hjá]gmail.com.

Tvær peysur munu hljóta vegleg verðlaun; besta peysan og frumlegasta peysan. Farið verður yfir peysurnar og úrslit kynnt 20. júní næstkomandi. Hlutleysis verður gætt til hins ítrasta og dómarar eru ekki tengdir Uppspuna og fá þeir ekki að vita hver á hvaða peysu.

Mjög spennt Hulda segist eiga von á góðri þátttöku í keppninni enda sé hún orðin mjög spennt. „Ó, já, ég er mjög spennt en nú þegar hefur fólk sýnt þessu mikinn áhuga og nokkrir búnir að tilkynna að þeir ætli að taka þátt. Það verður hátíð 20. júní því við ætlum að hafa daginn skemmtilegan og bjóða t.d. styrktaraðilum og þátttakendum ásamt öðrum áhugasömum að koma og vera viðstödd verðlaunaafhendinguna og gera þessu svolítið hátt undir höfði,“ segir Hulda.