Rokkað og rólað
Rokkkór Húnaþings vestra er félagsskapur á þriðja tug íbúa Húnaþings undir stjórn Ingibjargar Jónsdóttur frá Syðsta-Ósi í Miðfirði og þar láta kórfélagar svo sannarlega í sér heyra.
Ingibjörg hefur verið viðloðin tónlist frá unga aldri og hafði stýrt nokkrum fjölda tónlistarverkefna þegar hún var beðin um að stýra kór sem væri á þeirri línu að syngja popp og rokk fremur en annað
„Mér fannst þetta strax jákvæð og skemmtileg hugmynd, sérstaklega þar sem um popp- og rokklög væri að ræða, en var þó pínu óörugg þar sem ég hafði aldrei stjórnað kór nema aðstoðað við það í verkefnum leikflokksins á svæðinu,“ segir Ingibjörg, sem hefur aldeilis ekki séð eftir þessari ákvörðun.
Ingimar Sigurðsson, bassi og einn þriggja kórstjórnenda auk Ingibjargar, tekur undir og segir frá því að upphaflega hafi kórinn hafið feril sinn á versta tíma mögulegum. „Þetta var rétt fyrir Covid, þannig að það var nú ekki fyrr en í ársbyrjun 2022 sem farið var að æfa reglulega og fyrstu tónleikarnir þá um haustið. Héldum síðan til Reykjavíkur í janúar árið eftir og vorum með tónleika í Iðnó sem voru mjög vel sóttir. Sjálfur hóf ég feril minn í rokkkórnum um vorið, hafði áður verið í karlakórnum sem fjaraði reyndar undan í Covid. Þetta er mikið stuð og kórinn er í dag í kringum 26 manns,“ segir Ingimar.
Hljómsveit spilar undir kórsönginn og segir Ingimar meðlimi hennar allt frá lækninum á Hvammstanga til bróður Ingibjargar kórstjóra.
Kórinn heldur þrenna tónleika nú í mars sem hefjast í Lindakirkju Kópavogs þann 22. mars, svo í félagsheimilinu Miðgarði í Skagafirði 27. mars og lýkur á heimaslóðum kórsins, í félagsheimili Hvammstanga, þann 29. mars. Má ætla að mikið stuð verði á tónleikunum sem hefjast allir kl. 21.00, en dagskráin inni- heldur tónlist sem spannar yfir 50 ára tímabil. Miðaverð er 5.000 krónur fyrir þá sem sjá fyrir sér að mæta. Ingimar segir kórinn einnig vera á leið vestur í Dali, en þau voru beðin um að syngja á Jörfagleðinni einhvern tíma í lok apríl. „Við hittumst annars einu sinni í viku á æfingum sem fara fram í Ásbyrgi á Laugarbakka fram að júlí þegar við förum í sumarfrí, enda margir að heyja,“ segir Ingimar, sem sjálfur er sauðfjárbóndi á Kjörseyri í Hrútafirði. Aldursbil hópsins er um sextíu ár og um afar fjölbreyttan hóp að ræða, kennarar, fjármálastjóri, rafvirkjar og heilir ellefu bændur auk tveggja sem eru með hesta sem aukabúgrein.
„Fiftí-fiftí skipting svo á milli þeirra sem búa á Hvammstanga og þeirra sem eru úti í sveitum, 150 km keyrsla fram og til baka fyrir þá sem koma lengst að,“ segir Ingimar. Hann er sjálfur alæta á tónlist og nýtur þess að syngja þau fjölbreyttu lög sem kórinn hefur verið að æfa. „Við höfum verið að taka sjö laga Bubba-syrpu, gömul og góð lög, svo rokkballöður, Abba, Tailor Swift, Skálmöld og bara hvað sem er í rauninni,“ lýkur hann máli sínu og mælir eindregið með því að fólk drífi sig í kór, enda öllum hollt að syngja af hjartans lyst.
