Róbóti í stuði
Róbótar Internetsins verða betri og betri í bridds. Þeir eru reyndar oft slakir í vörninni og meldingar ganga oft svona og svona, einkum ef andstæðingar melda.
En útspil þróaðri tegunda eru oft góð og í úrspilinu eru róbótar ansi sleipir. Fyrir kemur að þróaðri róbótar á Bridgebase Online slái mörgum mannsheilanum við er kemur að rökvísi, en veltur á aðstæðum hverju sinni.
Fyrir skemmstu tók umsjónarmaður þátt í briddsmóti á Internetinu þar sem menn og róbótar spiluðu saman. Þá kom eftirfarandi hönd upp:
Sagnir okkar Botta enduðu í 6 spöðum. Útspil tíguldrottning og ég hallaði mér aftur í stólnum og fór yfir möguleikana. Hvernig myndi ég spila í tvímenningi þar sem yfirslagurinn skiptir öllu? Hvernig myndi lesandinn spila? Hver er besta leiðin að jafnvel 13 slögum?
Róbótinn tók sér ekki langa „umhugsun“ hann teiknaði upp að tígulgosinn væri í fylgd með útspilinu. Gott gisk. Drap og spilaði trompi þrisvar, svínaði svo tígli og það gekk vel. Þegar hann vissi af fjórum tíglum hjá útspilaranum, fannst honum líklegra að laufsvíning gengi vegna þess að færri lauf voru þá til skiptanna miðað við aðrar upplýsingar róbótanum á vinstri hönd. Róbótinn kastaði því laufi í fjórða fría tígulinn en ekki hjarta. Vel heppnuð trompsvíning var næst á dagskrá. Innkoma á hjartaás, 13 slagir. Hvað fékkst þú marga slagi?
Briddsarar ræða hvort ofurtölvur muni um síðir sigra mannsheilann í briddsinum. Þar sem briddsíþróttin er leikur mannlegra mistaka og snýst ekki bara um rök eins og skákin, telja flestir ólíklegt að tæknin veiti mannsheilanum verulega samkeppni í þessum leik mannlífsins.
En hvað gott með öðru.
