Róbóta á illgresið
Gætu róbótar útrýmt þörfinni fyrir illgresiseyði?
Bandarískir bændur eru meðal þeirra sem farnir eru að þreifa fyrir sér með notkun svokallaðra illgresisróbóta á ökrum. The Guardian segir frá bónda nokkrum í miðju Kansas sem daglega horfir á róbóta sína skrölta fram og aftur rásirnar milli ræktunarplantnanna og sneiða niður hverja örðu illgresis. Róbótarnir eru fremur litlir, 1,2x0,6 m, en afkastadrjúgir.
Bóndinn sem um ræðir, Clint Brauer að nafni, var áður tæknimaður í Kaliforníu en flutti á fjölskyldubýlið þegar faðir hans fékk Parkinson-sjúkdóminn. Brauer stofnaði landbúnaðartæknifyrirtæki og smíðar og forritar róbóta sína í skúr við bóndabæinn. Hann segir róbótana einkar mikilvæga til að hjálpa bændum að draga úr notkun varnarefna og vernda þannig eigin heilsu og umhverfisins betur.
Nú eru tuttugu bændur skráðir í róbótaþjónustu hjá Brauer og vonir standa til að uppræta megi illgresi á þennan hátt á allt að 2.023 hekturum lands í ár.
Það er kunnara en frá þurfi að segja að bændur um allan heim hafa átt í hatrammri baráttu við illgresi. Þeir hafa togað það upp, klippt niður, drepið það með verkfærum – og efnum sem sum hver eru mjög skaðleg fyrir lífríkið. Varnarefnanotkun hefur verið vaxandi sl. 50 árin eða svo en nú er mögulega að birtast betri valkostur með notkun róbóta og auknum nákvæmnisbúskap. Þannig hefur fjárhagslegur stuðningur streymt til fyrirtækja sem búa til illgresisróbóta, frá áhættufjármagnssjóðum, einkafjárfestum og stórum matvæla- og landbúnaðarfyrirtækjum sem eru fús til að veðja á róbótana. Efasemdaraddir eru þó einnig uppi en líklegt að róbótarnir verði góð viðbót við ýmsar fleiri aðferðir til illgresiseyðingar.
