Reykjavík Open er stærsta mót ársins
Ég skrifaði um daginn að janúarmánuður væri mikill skákmánuður á Íslandi.
Mars og apríl eru líka mánuðir stórra skákmóta og stundum ferbrúar. Íslandsmót skákfélaga fer venjulega fram í mars og svo stærsta árlega skákmótið sem haldið er á landinu, Reykjavík Open, fer fram að þessu sinni 9.–16. apríl í Hörpu.
Reykjavík Open hefur verið haldið samfleytt áratugum saman og hefur öðlast ríkan sess meðal skákmanna, innlendra sem erlendra, og er líklega á topp 20 listanum yfir stærstu mót Evrópu, sem haldin eru árlega. Síðustu þrjú árin hafa keppendur verið rúmlega 400 og setja hefur þurft takmörkun á fjölda þeirra sem vilja vera með og miðað við 400. Plássið leyfir ekki meira. Þegar þetta er ritað eru 250 keppendur skráðir til leiks frá 35 þjóðlöndum tveimur mánuðum áður en mótið hefst. Mótið er opið öllum áhugasömum en ljóst er að þeir sem hyggja á þátttöku þurfa að ákveða sig í tíma svo þeir missi ekki af og þurfi að bíða fram á næsta ár.
Undirritaður hefur aldrei tekið þátt í Reykjavík Open, en stefnan er sett á að gera það í framtíðinni. Mótið stendur yfir í rúma viku og því ekki alveg einfalt að taka þátt í svo löngu móti.
Ef lesendur Bændablaðsins luma á áhugaverðum skákum geta þeir haft samband. Umsjón: Hermann Aðalsteinsson, lyngbrekku@simnet.is
Skákþraut dagsins er í þyngri kantinum og hún snýst um að finna rétta leikinn fyrir svartan sem þvingar hvítan til uppgjafar strax. Svartur á leik
Df2 ! er leikurinn. Ef hvítur drepur drottninguna þá á svartur Hd1 skák sem endar með máti á f1. Ef hvítur valdar hrókinn með Be3 þá á svartur mát á g2. Og ef hvítur leikur hrók á g1, þá á svartur Hd1 sem endar alltaf með máti fyrir rest.
