Reykjavík Open 2025 – Friðriki til heiðurs

Reykjavík Open, sem hófst miðvikudaginn 9. apríl í Hörpu, hefur fyrir löngu fest sig í sessi sem fjölmennasta og glæsilegasta skákmót sem haldið er árlega á Íslandi.

Mótið núna var haldið Friðrik Ólafssyni til heiðurs, en eins og margir vita lést hann fyrir fáeinum dögum síðan. Friðrik var fyrsti stórmeistari Íslendinga og má segja að hann hafi rutt brautina fyrir aðra skákmenn sem á eftir komu.

Eins og áður segir þá er Reykjavík Open risavaxið skákmót og taka meira en 400 keppendur þátt í mótinu og hefur svo verið í nokkur ár. Loka þurfti fyrir skráningu í lok mars, þar sem ekki var pláss fyrir fleiri í mótinu. Reykjavík Open er eina mótið á Íslandi þar sem fleiri erlendir skákmenn taka þátt en innlendir, sem segir okkur að mótið sé orðið eitt af þeim stóru alþjóðlegu skákmótum sem margir vilja vera með í. Mótið hefur einnig þá sérstöðu að það er ekki flokkaskipt, hvorki eftir stigum né aldri. Allir tefla í sama opna flokknum og líkur á því að tefla við stórmeistara eru því ágætar.

424 keppendur eru skráðir til leiks og þar af „aðeins“ 90 Íslendingar. Erlendu keppendurnir koma alls staðar að úr heiminum, en skákmenn frá 50 þjóðlöndum og af öllum getustigum, frá sterkum stórmeisturum niður í stiglausa skákmenn, mæta til leiks. 35 stórmeistarar taka þátt í mótinu og fjöldinn allur af öðrum titilhöfum. Tefldar verða 9 umferðir á 7 dögum og hægt verður að taka 3 sinnum sjálfvalda yfirsetu (bye) í mótinu. Fyrir sjálfvalda yfirsetu fæst hálfur vinningur.

Það hefur færst mjög í vöxt að undanförnu að mótshaldarar bjóði upp á að keppendur geti tekið sjálfvalda yfirsetu í mótum, oftast 1–3 sinnum. Aldrei þó í lokaumferðinni. Margir notfæra sér það og þá sérstaklega erlendir keppendur og geta þá skoðað landið eitthvað í leiðinni og kíkt t.d. á gröf Fischers í Laugdælakirkjugarði, sem er mjög vinsælt að gera. Gera má ráð fyrir mikilli umferð af „skáktúristum“ í Laugdælakirkjugarði dagana sem mótið stendur yfir.

Þetta er síðasti skákpistillinn sem undirritaður skrifar í Bændablaðið og ég vona að lesendur hafi haft gaman af. Bændablaðið þakkar Hermanni afar skemmtilega og fróðlega pistla.

Bændablaðið þakkar Hermanni afar skemmtilega og fróðlega pistla