Rekstrarbati hjá Norðlenska Kjarnafæði
Hagnaður Kjarnafæðis Norðlenska var 385,5 milljónir króna á síðasta ári fyrir skatta, sem er 154 milljónum meiri hagnaður en var árið 2022.
Í tilkynningu frá félaginu segir að afkoman sé í samræmi við áætlanir, þrátt fyrir krefjandi aðstæður á árinu. Fjármagnskostnaður hafi verið samstæðunni íþyngjandi í því háa vaxtaumhverfi sem einkenndi árið 2023 en aðhald í rekstri og hagræðingaraðgerðir vegna samruna Kjarnafæðis og Norðlenska hafi skilað verulegum rekstrarbata.
Fram kemur einnig að árið 2023 hafi verið annað heila rekstrarárið eftir sameiningu Kjarnafæðis og Norðlenska og fyrsta heila rekstrarárið þar sem áhrif sameiningarinnar komi að verulegu leyti fram.
Haft er eftir Ágústi Torfa Haukssyni, forstjóra félagsins, að nýsamþykkt lög sem heimila verkaskiptingu, samvinnu og sameiningu afurðastöðva, sem teljast til framleiðendafélaga, muni væntanlega hafa áhrif á starfsemi félagsins á árinu 2024. „Kjarnafæði Norðlenska uppfyllir kröfur sem gerðar eru til framleiðendafélaga og ljóst að veruleg tækifæri eru til lækkunar á rekstrarkostnaði og fjárbindingu í greininni lánist aðilum í greininni að nýta þær heimildir sem í lögunum felast.
Það hagræði sem af slíku samstarfi eða sameiningum getur hlotist verður að skila sér að nær öllu leyti í tvennt; hækkanir til bænda og í að halda aftur af verðhækkunum á markaði til að vinna að lækkun verðbólgu í hagkerfinu.
Hagsmunir Kjarnafæðis Norðlenska eru mjög miklir hvað þetta varðar, lækkun verðbólgu og þar af leiðandi vaxta hefði afar jákvæð áhrif á félagið og viðskiptavini þess. Svo er minnkandi framleiðsluvilji bænda orðin ein helsta ógnun við rekstur afurðastöðva og því mikilvægt að hægt verði að bæta kjör bænda og stuðla þannig að eðlilegum rekstrarskilyrðum og nauðsynlegri nýliðun í landbúnaði,“ segir Ágúst Torfi.
