Raforkukostnaður lækkar hjá garðyrkjubændum

Garðyrkjubændum með vaxtarlýsingu hefur nýlega boðist að lækka raforkukostnað sinn talsvert.

Axel Sæland, formaður garðyrkjudeildar Bændasamtaka Íslands, segir að tímabundið ástand á raforkumarkaði hafi leitt til þess að raforkusalar buðu betra verð. Vísar Axel þar til þess að vegna bilunar í álveri Norðuráls og rekstrarstöðvunar PCC við Húsavík á síðasta ári varð talsvert af umfram raforku til staðar í landinu.

Bændum boðin 25% lækkun

Óli Finnsson, sem á og rekur garðyrkjustöðina Heiðmörk í Laugarási, segir að hann fylgi sama verði og HS Orka hafi boðið öðrum garðyrkjubændum, sem þýðir 25% lækkun.

Hann telur að langflestir bændur í ylrækt á Íslandi séu hjá HS Orku.

Hækkuðu ekki vöruverð

„Ég vona að þetta hafi orðið til þess að allir garðyrkjubændur sem eru með vaxtarlýsingu hafi fengið betra verð,“ segir Axel. „Þar sem hver og einn garðyrkjubóndi gerir sína samninga get ég ekki talað hér fyrir alla. Við á Espiflöt, sem erum í blómarækt, vonumst til að þetta verði til þess að ná allt að 5% rekstrarhagræðingu á árinu 2026 ef allt gengur upp.

Því tókum við þá ákvörðun að hækka ekki vöruverð um áramótin, þrátt fyrir verbólgu síðasta árs og þær launahækkanir sem tóku gildi núna um áramótin.

Þannig viljum við að neytendur njóti þess með okkur að raforkuverð hafi lækkað núna um áramótin.“