Páskasúkkulaðibollinn

Mikið úrval er af súkkulaði í búðum og vefverslunum.

Á páskum er hefð fyrir miklu súkkulaðiáti víða um veröld. 100 % súkkulaði er næringarríkt og eykur einbeitingu.

Hreint súkkulaði er næringarríkt

Það er fádæma lúxus að útbúa sér góðan súkkulaðibolla og njóta hans í rólegheitunum, jafnvel uppi í rúmi. Fram undan er tíð súkkulaðiáts yfir páska og vert að huga að því súkkulaði sem er valið. Súkkulaði með mjög háu kakóinnihaldi, 85-100% fæst víða. Best er ef það er lífrænt ræktað, með því að velja lífrænt tryggir neytandinn sig fyrir notkun hvers kyns plöntuvarnarefnum í ræktuninni. Lífrænt ræktaðar vörur eru merktar með græna Evrópulaufinu. 100 % súkkulaði er alveg ósætt, inniheldur engin aukaefni en öllu jafna enn kakósmjörið.

Hreint súkkulaði er bæði næringarríkt, fullt af andoxunarefnum og veitir ómælda ánægju. Vinsælt er að laga heitt súkkulaði og drekka þegar einbeitingar er þörf, til dæmis fyrir hugleiðslu, skrif eða annað sem krefst góðrar athygli.

Hægt er að útbúa heitan súkkulaðibolla hvort heldur er með kúamjólk eða jurtamjólk, svo sem haframjólk eða möndlumjólk ef vilji er fyrir því að gera súkkulaðið eilítið léttara. Til að laga súkkulaðibolla eru um 20 g af því besta og hreinasta súkkulaði sem finnst sett út í góðan bolla af mjólk og hitað við vægan hita. Gæta þarf þess að ekki sjóði því þá byrja næringarefni að tapast úr súkkulaðinu. Hægt er að krydda með salti á hnífsoddi, eldpipar, kardimommum eða stjörnuanís og bæta við sætu ef vill, svo sem hunangi, hrásykri eða rapadura sykri sem hefur minni áhrif á blóðsykurinn.