Orðið erfitt að fá vondan mat á ferð um landið

Jón Gnarr ræðir um veitingastaðaflóru um land allt í nýjum hlaðvarpsþætti Kaupfélagsins. Hann minnist þess tíma þegar fátt fékkst við þjóðveginn nema pylsur og hamborgarar. „Í gamla daga þá gat maður í besta falli komist í eitthvað mauksoðið pasta sem gat talist talist einhverskonar heimilismatur eða mannamatur fyrir utan eitthvað skyndibitadrasl.“ Nú er öldin önnur að mati Jóns.

„Ég held að margir eigi eftir að reka upp stór augu þegar þeir komast að því hvað það er svakalega mikið af fáránlega góðum veitingastöðum á ólíklegustu stöðum. Síðustu ár þegar ég hef verið að fara um landið þá er hreinlega orðin leitun að vondum mat. Það er bara erfitt að fá vondan mat núorðið! Þetta er orðið sjúklega gott og frábærir staðir sem hafa sprottið upp hingað og þangað. Það eru svakalega mikil gæði, gott framboð og yfirleitt, hefur mér fundist, á mjög sanngjörnu verði,“ segir Jón Gnarr.

Kaupfélagið er aðgengilegt í spilaranum hér undir en er líka að finna á öllum helstu hlaðvarpsveitum.