Óku á kjörstað á gömlu dráttarvélunum sínum

Fjölskyldan á Litlu-Grund í Reykhólahreppi reynir alltaf að fara á gömlum dráttarvélum sem eru til á bænum þegar kosið er til Alþingis, sveitarstjórna eða til forseta.

Það brást ekki 16. maí þegar sveitarstjórnarkosningarnar fóru fram því þá fór hópur af bænum á nokkrum vélum og kaus í Reykhólaskóla.

„Þetta gekk vel og vakti mikla athygli eins og alltaf. Það er gaman að gera eitthvað svona á kjördag en ætli við eigum ekki einhverjar tíu gamlar dráttarvélar, sem flestar eru gangfærar.

Ég hef ekki hugmynd um hvað fólkið kaus, það hefur hver það fyrir sig,“ segir Guðmundur Ólafsson, bóndi og dráttarvélaáhugamaður, hlæjandi.