Öflugt leiklistarstarf í Öxarfjarðarskóla

Nemendur Öxarfjarðarskóla hafa undanfarin ár sett upp stórar og miklar leiksýningar, þær hafa  vakið athygli og unnið til viðurkenninga.

 

Bændablaðið fjallaði um það öfluga leiklistarstarf sem fram fer í Öxarfjarðarskóla í blaðinu sem út kom 12. maí síðastliðinn. Þar var spjallað við Hrund Ásgeirsdóttur og hún titluð skólastjóri, en hið rétta er að hún er aðstoðarskólastjóri í Öxarfjarðarskóla auk þess að leikstýra árshátíðarverkefnunum.  Skólastjóri er Guðrún Sigríður Kristjánsdóttir. Myndirnar sem fylgdu umfjölluninni tók Kristján Ingi Jónsson. Beðist er velvirðingar á þessu.Öxarfjarðarskóli er samrekinn leik- og grunnskóli með alls rúmlega 40 nemendur. Hann er staðsettur í Lundi í Öxarfirði og er því miðsvæðis í skólasamfélaginu sem spannar allt frá Kelduhverfi í vestri út á Melrakkasléttu í austri.  Einnig er rekin leikskóladeild á Kópaskeri.  Í Öxarfjarðarskóla  er  löng hefð fyrir því að á árshátíð séu sett á svið stór og krefjandi verk í fullri lengd,  þá gjarnan söngleikir.  Fyrst um sinn var það einkum í höndum unglingadeildar að setja á svið stór verk en þau yngri voru þá oftar með stutta þætti, söng og dans.

 

Standa sig með stakri prýði

 

Fyrir þremur árum var ákveðið að prófa að setja eitt stórt verk á svið þar sem allir nemendur grunnskólans frá 1.–10. bekk, ásamt elstu nemendum leikskólans, stigu á svið.  Fyrir valinu varð hið sígilda verk, Dýrin í Hálsaskógi eftir Thorbjörn Egner og tókst það svo glimrandi vel að ákveðið var að prófa sama fyrirkomulag aftur að ári.  Í fyrravor var svo settur upp söngleikurinn Bugsy Malone eftir Alan Parker.  Enn og aftur stóðu nemendur sig með stakri prýði svo eftir var tekið.  Leiksýningin hlaut tilnefningu til Foreldraverðlauna Heimilis og skóla 2015 fyrir árshátíðina og fékk viðurkenningarskjal þess efnis. Í ár var svo ráðist í sýninguna Ronju ræningjadóttur eftir Astrid Lindgren og enn sem fyrr tóku allir nemendur þátt.