Oddný Anna hættir sem framkvæmdastjóri
Oddný Anna Björnsdóttir, framkvæmdastjóri Samtaka smáframleiðenda matvæla (SSFM) og Beint frá býli, hefur sagt starfi sínu lausu sem hún hefur gegnt frá stofnun SSFM árið 2019.
Árið 2022 varð Beint frá býli aðildarfélag SSFM og upp frá því hafa félögin haft sameiginlega stefnu og aðgerðaáætlun. „ Í dag eru í kringum 220 fyrirtæki í SSFM/ BFB, 80% á landsbyggðinni og 20% á höfuðborgarsvæðinu,“ segir Oddný.
Hún hyggst láta af störfum þegar nýr framkvæmdastjóri hefur tekið við en hefur ráðið sig til ráðgjafarstarfa fyrir Bændasamtök Íslands (BÍ).
„Hún er ráðin inn sem verktaki, tímabundið, varðandi ýmis afmörkuð verkefni, þar með talin verkefni sem snúa að þeirri lagaog reglugerðarumgjörð sem snýr að heimavinnslu og sölu afurða milliliðalaust og beint frá bændum,“ segir Margrét Ágústa Sigurðardóttir, framkvæmdastjóri BÍ.
„Hún hefur yfirgripsmikla þekkingu á málaflokknum, til að mynda hvar stjórnvöld geti gert betur til að auðvelda þeim bændum ferlið sem fylgir því að vinna afurðir sínar heima og selja áfram milliliðalaust. Þá hefur hún enn fremur mikla reynslu og þekkingu á viðskiptaumhverfinu og síðan vel kunnug landbúnaðinum eins og flestir vita, þannig að það er bara virkilega mikill fengur að fá hana til að vera Bændasamtökunum til ráðgjafar. Beint frá býli er náttúrlega aðildarfélag að BÍ líka,“ segir Margrét Ágústa enn fremur.
