Nýburagjafir vekja lukku
Nokkur sveitarfélög halda uppi þeirri skemmtilegu hefð að gefa nýburum ársins í viðkomandi sveitarfélagi gjafir í tilefni af fæðingunni og kunna foreldrar og fjölskyldur barnanna vel að meta gjafirnar.
Hveragerðisbær gefur til dæmis vísnabók, Dalvíkurbyggð gefur armband, Þingeyjarsveit gefur taubleyjupakka svo einhver sveitarfélög séu nefnd. Í Húnaþingi vestra færir sveitarstjórinn öllum nýburum sveitarfélagsins gjafapakka en árið 2024 reyndist þar metár í fæðingum þegar sautján nýir íbúar litu dagsins ljós.
„Með gjöfunum viljum við leggja áherslu á að Húnaþing vestra er fjölskylduvænt samfélag og tekur vel á móti okkar nýjustu íbúum. Ég hef í langflestum tilfellum farið með pakkann heim til fólks og skrifa alltaf kort með.
Það er gaman að hitta nýbakaða foreldra, stundum koma pabbarnir til dyra og mamman og barnið eru sofandi en stundum eru litlu krílin vakandi og ég fæ að kíkja aðeins á þau,“ segir Unnur Valborg Hilmarsdóttir, sveitarstjóri Húnaþings vestra.
Fríða Marý Halldórsdóttir á Hvammstanga er ein þeirra sem nýlega fengu gjöf frá sveitarfélaginu. „Nýburagjöfin er frábært framtak til að styðja við nýbakaða foreldra á svæðinu. Gjöfin var mjög flott og innihélt meðal annars samfellu, lambhúshettu frá 66°Norður, slefsmekk, snuð, fræðslubók og ýmislegt fleira nýtilegt fyrir fyrstu vikurnar með ungann. Þetta er virkilega vel gert og til fyrirmyndar hjá sveitarfélaginu,“ segir Fríða Marý. Henni og manni hennar, Kristjáni Ársælssyni, fæddist drengur í byrjun janúar en fyrir eiga þau dótturina Júlíu Jöklu, sem er þriggja ára.
