Ný hveitimylla ólíkleg
Opinberir aðilar hafa ekki gefið Líflandi formlega staðfestingu á að reglur sem stóðu í vegi fyrir starfsleyfi nýrrar hveitimyllu fyrir tveimur árum hafi verið felldar úr gildi. Því lítur Lífland svo á að forsendur hafi ekki breyst.
Arnar Þórisson, forstjóri Líflands, segir að þrátt fyrir ummæli atvinnuvegaráðherra í fjölmiðlum um að fyrirtækið fengi starfsleyfi fyrir hveitimyllu Kornax á Grundartanga ef það myndi sækja um aftur, sé ekki ljóst við hvað hún eigi. Samkvæmt honum hafa engir opinberir aðilar rætt þessi mál við stjórnendur hjá Líflandi og ekki útlit fyrir að Lífland reisi nýja hveitimyllu.
Á meðan enn þá er óvissa um lagalegan grundvöll starfseminnar á Grundartanga telji fyrirtækið ekki forsvaranlegt að halda áfram undirbúningi. Samkvæmt Arnari tæki minnst tvö til þrjú ár að koma nýrri hveitimyllu í rekstur frá samþykki leyfis, enda flókin uppbygging og fjárfesting fyrir allt að þrjá milljarða króna. Hann segir fyrirtækið hafa haft metnað til að halda rekstri hveitimyllunnar í Sundahöfn áfram, en eins og komið hefur fram eiga Faxaflóahafnir húsnæðið og hefur leigusamningnum verið sagt upp. Áframhaldandi afnot af húsinu hafi verið háð því að hafin væri uppbygging á nýjum stað, en þar sem áætluð hveitimylla á Grundartanga sigldi í strand hafi fyrirtækinu verið tilkynnt fyrir nokkrum misserum að því bæri að víkja sem fyrst.
Arnar bendir á að íslenski markaðurinn með hveiti sé lítill og afar krefjandi sé að framleiða á verði sem stenst samkeppni við stórar myllur erlendis. Það hafi tekist með mikilli útsjónarsemi í gömlu myllunni í Korngörðum. Eftir að áframhaldandi rekstur þar var úr myndinni hafi fyrirtækið ekki séð neinn kost annan en uppbyggingu í nágrenni við þá starfsemi sem Lífland rekur nú þegar á Grundartanga. „Við höfum metnað fyrir innlendri framleiðslu, en það eru takmörk fyrir því hvað einkafyrirtæki getur lagt af mörkum til að tryggja fæðuöryggi. Það er mat okkar að opinber stuðningur, hvort sem um ræðir aðkomu að leyfismálum, fjármögnun eða undirbúningi að lóðum og innviðum, sé forsenda þess að slíkt verkefni verði raunhæft,“ segir Arnar.
Nú er Lífland búið að ráðast í fjárfestingu á búnaði til að halda áfram afhendingu á hveiti sem malað er í Danmörku undir merkjum Kornax. Kostnaðurinn við það hefur verið nokkur og hefur fyrirtækið skrifað undir samninga við dönsku aðilana sem eru bindandi til nokkurra ára. Því má ekki vænta sviplegra breytinga á þeirri atburðarás sem hafin er núna.
