Nokkur orð um skýrsluhald sauðfjár

Um mánaðamótin mars/apríl sl. var skýrsluhaldskerfið í sauðfjárrækt uppfært. Uppfærslunni var svo fylgt eftir með kynningarfundum um allt land í apríl og júní sem nú er lokið en á þá fundi mættu rúmlega 600 aðilar. Á fundunum var farið yfir helstu breytingar á kerfinu og sýnt hvernig skráningarkerfið virkar. 

Samhliða þessu voru útbúin kennslumyndbönd og eru tenglar á þau aðgengilegir á heimasíðu RML. 

 

Skráning vorgagna hefur gengið vel það sem af er. Af athugasemdum/ábendingum frá notendum að dæma eru menn almennt ánægðir og telja skráningu vorgagna ganga betur fyrir sig en í eldri útgáfu. Áfram er þó unnið að endurbótum og lagfæringum á kerfinu og allar ábendingar vel þegnar. Hægt er að senda þær á netfangið fjarvis@rml.is eða með því að nota hnappinn „Senda athugasemd“ í Fjárvís.

 

Ein þeirra breytinga sem nú gildir frá vorinu 2015 er að notendur velja sjálfir hvort þeir vilji áfram fá sendar bækur til útfyllingar. Innheimt verður gjald af þeim sem kjósa að fá bækurnar sendar áfram. Gjaldið verður 2.000 kr/án vsk. á hverja bók. Notendur geta sjálfir prentað bækur með því að velja PDF-skjal í kerfinu sem útbýr bókina til útprentunar á A4 blöð. Við uppfærslu Fjárvís var þessi möguleiki þannig stilltur hjá öllum notendum að þeir myndu vilja fá bók en þessu atriði er breytt í „Stillingar – Notandi“. Þeir notendur sem ekki vilja fá haustbók 2015 verða því að breyta stillingum á sínu búi fyrir miðjan ágúst nk. Þá verður ráðist í að prenta bækur fyrir þá sem vilja fá bækur til útfyllingar í haust.

Líkt og áður verður kynbótamat fyrir frjósemi reiknað í sumar og gögn frá vorinu 2015 tekin með svo nýjustu upplýsingar um þann eiginlega séu tiltækar við val ásetningslamba í haust. 

 

Á vorbókunum sem menn eiga núna er viðmiðunardagsetning vegna gagnaskila 15. júlí nk. Vanti menn aðstoð við skráningu gagna er hægt að hafa samband við RML í síma 516-5000 eða með því að senda tölvupóst á fjarvis@rml.is. 

 

Jafnframt er minnt á kennslumyndböndin á heimasíðu RML, þar eru í dag myndbönd sem taka á öllum helstu atriðum varðandi skráningu vorgagna.