Neðri-Mýrar

Sindri og Birna keyptu jörðina af fyrri ábúendum árið 2011. 

 

Þau hafa síðan þá unnið að því að auka framleiðslu búsins og bæta aðstöðu, ásamt því að skemmta sér konunglega.

 

Býli:  Neðri-Mýrar.

 

Staðsett í sveit:  Refasveit, Austur-Húnavatnssýslu.

 

Ábúendur: Sindri Bjarnason og Birna Ágústsdóttir.

 

Fjölskyldustærð (og gæludýra): 

Börnin eru fjögur, Tanja Kristín (13 ára), Atli Þór (8 ára), Arnór Ágúst (6 ára) og Heiða Bjarndís (6 mánaða). Þá búa á heimilinu þrír hundar, tíkin Mia og rakkarnir Snati og Kraftur.

 

Stærð jarðar? Um 450 hektarar.

 

Gerð bús? Blandað bú.

 

Fjöldi búfjár og tegundir? 30 kýr, tilheyrandi kálfar, 300 kindur og alltof mikið af hrossum.

 

Hvernig gengur hefðbundinn vinnudagur fyrir sig á bænum?

Hefðbundinn vinnudagur hefst í fjósi, þá er gefið í fjárhúsum og svo haldið til þeirra verka sem eru helst aðkallandi þann daginn. Vinnudeginum lýkur svo eins og hann byrjar, í fjósi og fjárhúsum.

 

Skemmtilegustu/leiðinlegustu bústörfin? Sauðburður er skemmtilegastur en girðingavinna þykir leiðinlegust.

 

Hvernig sjáið þið búskapinn fyrir ykkur á jörðinni eftir fimm ár? Börnin verða næstum farin að sjá um þetta, er það ekki?

 

Hvaða skoðun hafið þið á félagsmálum bænda? Þau eru bara í ágætu horfi.

 

Hvernig mun íslenskum landbúnaði vegna í framtíðinni? Vel, ekkert annað hægt en vera bjartsýnn á framtíðina.

 

Hvar teljið þið að helstu tækifærin séu í útflutningi íslenskra búvara? Við teljum helstu tækifærin liggja í útflutningi á skyri og lambakjöti. 

 

Hvað er alltaf til í ísskápnum? Mjólk, smjör, ostur, lifrarkæfa, gúrka og hálf krukka af rauðrófum. Hún er reyndar búin að vera þarna mjög lengi.

 

Hver er vinsælasti maturinn á heimilinu? Nautakjöt og bernaise.

 

Eftirminnilegasta atvikið við bústörfin? Við höfum ekki búið nógu lengi enn þá til að neitt toppi daginn sem við tókum við.