Mikilvægi moldar
Mikilvægi moldar var rædd á málþingi í Norræna húsinu 4. júní síðastliðinn. Þar var fjallað um moldina sem eina mikilvægustu en vanmetnustu auðlind jarðar.
Á málþinginu héldu vistfræðingurinn Thomas Crowther, prófessor við ETH Zürich og Kristín Sigurðardóttir, slysa- og bráðalæknir erindi. Kristín talaði um tengsl heilbrigðrar moldar og heilbrigðs fólks út frá heildrænni sýn á heilsu.
Um 95% þeirrar fæðu sem mannkynið neytir á uppruna sinn í jarðvegi og gegnir hann lykilhlutverki í hringrás næringarefna, hreinsun vatns og bindingu kolefna. Kristín lagði meðal annars áherslu á góð matvæli og merkingu þeirra. Henni finnst vöntun á skýrum reglugerðum varðandi merkingu matvæla á Íslandi. „Ég vil vita hvaðan maturinn minn kemur, frá hvaða búum hann kemur og hvað fer í matvælin, þegar ég hef kost á því vel ég frekar lífrænt ræktað, því það vantar gjarnan upplýsingar. Eins og með möguleg eiturefni í ræktun eða jarðvegi þá vil ég fá að vita með saltið okkar, er mikið plast í því eða ekki, hvernig eru snefilefnin í því? Gegnsæi og upplýsing skiptir öllu máli.“ Bein snerting við mold hefur jákvæð áhrif á ónæmiskerfið og minnti Kristín á að við erum órjúfanlegur partur af náttúrunni. „Ekki hika við að sleppa hönskununum í garðyrkjunni,“ segir Kristín.
Að málþinginu loknu var pallborð með Kristínu, Ólafi Arnalds, prófessor emeritus í jarðvegsfræði við Landbúnaðarháskóla Íslands, og Salvöru Jónsdóttur skipulagsfræðingi. Ólafur lagði áherslu á að tala um moldina sem auðlind og að fjalla ætti um jarðveginn með einbeittari hætti í námsefni frá unga aldri. „Náttúruverndarsamtök hafa gleymt moldinni í baráttunni,“ segir Ólafur og vill aukna áherslu á endurheimt lands og jarðvegs á Íslandi. Bæði sögðu Kristín og Ólafur að bæta þyrfti samband okkar við jarðveginn. „Heilbrigður jarðvegur er undirstaða nær alls lífs á landi og okkur á því að þykja miklu vænna um jarðveginn,“ segir Kristín.
