Mikill gangur í LED-væðingu
Umhverfis-, orku- og loftslagsráðuneytið hefur veitt fjármunum á undanförnum misserum til þess að styðja garðyrkjubændur til fjárfestinga á LED-lömpum í gróðurhúsum. Með breyttri lýsingu tekst bændum að spara orku.
„Núna eru mörg gróðurhús búin að setja upp LED-lýsingu eða eru að vinna að því,“ segir Georg Ottósson í samtali. Hann rekur garðyrkjustöðvarnar Flúða-Jörfa og Flúðasveppi. „Við garðyrkjubændur komum skilaboðunum til stjórnvalda og það verður að segjast eins og er að ríkisstjórnin sem nú er við völd tók þátt í þessari þróun með því að veita styrk úr orkusjóði til kaupa á LED-ljósum. Með því hefur LED-væðingin í íslenskri garðyrkju verið tekin skrefinu lengra.
Þetta er búið að vera í deiglunni í mörg ár, en það eru tíu til fimmtán ár síðan fyrstu LED-ljósin komu í gróðurhús. Það sem háði okkur lengst af í garðyrkjunni var helst verðið á lömpunum, en fyrir ekki nema fimm árum var fjárfestingin einstaklega íþyngjandi. Þessi LEDvæðing er ekki bara í gróðurhúsum, heldur er þetta komið víða, enda eyða LED-ljós miklu minna rafmagni en eldri tækni miðað við ljósmagn. Þróunin hefur verið ört vaxandi síðustu árin og núna fannst okkur á garðyrkjustöðinni FlúðaJörfa ástæða til að fara af stað aftur og hafa fleiri stórar stöðvar á Íslandi.
Í okkar tilfelli vorum við með gamla natríumlampa sem við höfðum áfram til taks í húsinu og bættum LED-lýsingunni við. Það er ekki svo auðvelt að skipta yfir án nokkurra breytinga, þar sem LEDlýsingin gefur ekki sama hitann. En miðað við sama ljósmagn er hægt að áætla að við spörum 30 prósent orkunnar, eða meira. Ég vona að stjórnvöld haldi áfram að styrkja garðyrkjubændur á þessari vegferð, því að LED-lýsingin sparar rafmagn sem gæti nýst fyrir þúsundir heimila. Peningunum er vel varið og er árangurinn mikill og sýnilegur.
Í Flúða-Jörfa ræktum við meðal annars paprikur og hefur það gengið vel yfir dimmasta tímann í vetur. Þegar kemur að lýsingu er paprikan erfiðari við að eiga en til að mynda tómatar og gúrkur. Hún þarf ljósgeisla sem við fáum frá sólinni en ekki hefðbundinni raflýsingu, á meðan LED gefur möguleika á að breyta hlutfallinu á milli ólíkra geisla. Paprikunni líður vel undir þessari lýsingu því að þarna fær hún jafnvægi milli geisla sem við höfum verið að leita eftir og við getum stjórnað því mjög nákvæmlega. Ég geri ráð fyrir að þetta muni þróast enn meira á næstu árum. Þetta mun breyta miklu í framleiðslu á papriku yfir háskammdegið í nóvember, desember og janúar,“ segir Georg.
