Miðdalur
Þau Ólöf Ósk Guðmundsdóttir og Hafþór Finnbogason fluttu í Miðdal og tóku við búrekstrinum af foreldrum Ólafar í júní 2020, en þar á undan bjuggu þau á Hvanneyri og störfuðu bæði við Landbúnaðarháskóla Íslands.
Býli: Miðdalur. Staðsett í sveit: Kjós.
Ábúendur: Hafþór Finnbogason og Ólöf Ósk Guðmundsdóttir.
Fjölskyldustærð (og gæludýra): Við eigum tvö börn, Agnesi Heiðu, 5 ára og Guðmund Ara, sem er alveg að verða 3 ára.
Svo eru það kisurnar Prinsessa og Simbi og svo er nýjasti fjölskyldumeðlimurinn hún Sítróna, hvolpurinn okkar!
Stærð jarðar? 800 ha
Gerð bús? Kúabú fyrst og fremst.
Fjöldi búfjár og tegundir? 36 árskýr, 35 vetrarfóðraðar ær, 15 hross og 14 hænur.
Hvernig gengur hefðbundinn vinnudagur fyrir sig á bænum? Allir dagar byrja og enda í fjósinu. Þess á milli eru öll hin verkefnin unnin, sem eru ólík eftir árstíma.
Í maí tökum við líka á móti leikskóla- og skólahópum sem koma að skoða sveitina.
Ólöf vinnur að hluta utan bús og keyrir suma daga á Hvanneyri til að kenna við LbhÍ.
Skemmtilegustu/leiðinlegustu bústörfin? Það er allt skemmtilegt þegar það gengur vel og að sama skapi leiðinlegast þegar eitthvað bilar eða brotnar og þarf að stoppa verkið til að gera við.
Hvernig sjáið þið búskapinn fyrir ykkur á jörðinni eftir fimm ár? Hafþór vill fylla hesthúsið af nautum og reiðskemmuna af vélum, en hann fær það ekki í gegn ...
Hvar teljið þið að helstu tækifærin séu í útflutningi íslenskra búvara? Áhersla á íslenskan uppruna og ferskleika.
Hvað er alltaf til í ísskápnum? Smá afgangur af lambablóðsóttarlyfi ...
Hver er vinsælasti maturinn á heimilinu? Ef börnin eru spurð, er það grjónagrautur og slátur.
Foreldrarnir eru enn þá hrifnari af lambasteik með miklu af heimaræktuðum, ofnsteiktum kartöflum.
Eftirminnilegasta atvikið við bústörfin? Þegar verknemarnir vöktu okkur síðasta sumar um miðja nótt því þær höfðu sjálfar vaknað við baul við svefnherbergisgluggann. Svo stukkum við öll út á náttfötunum að smala kúnum úr garðinum ...
