Metfjöldi gesta sótti hátíðina heim

Mikið fjölmenni sótti Local Food Festival-matarmenningarhátíðina sem fram fór á Akureyri dagana 1. og 2. oktober. Gestafjöldinn er áætlaður á milli 15 til 16 þúsund manns sem gerir sýninguna að þeirri fjölsóttustu fram til þessa.  Sýningin var hin glæsilegasta og lögðu sýnendur mikinn metnað í að gera hana sem best úr garði. Ýmsar keppnir voru einnig í gangi og vöktu þær athygli gesta.

 

Tilgangur Local Food-hátíðarinnar er að vekja athygli á Norðurlandi og þeirri miklu matvælaframleiðslu sem þar fer fram, fjölbreyttu úrvali veitingastaða, matarmenningu og annarri framleiðslu sem tengist matvælum.

 

Norðurland er stærsta matvælaframleiðslusvæði landsins og er sýningin því kjörinn vettvangur fyrirtækja og einstaklinga í geiranum til að vekja athygli á framleiðslu, matarmenningu, matartengdri ferðaþjónustu og verslun.

 

Aron Bjarni Davíðsson á Múla­bergi fór með sigur af hólmi í keppni meðal kokkanema. Þá öttu þeir Einar Geirsson og Jónas Jóhannsson kokkaeinvígi á hátíðinni sem margir fylgdust grannt með. Áttu þeir félagar að elda tveggja rétta máltíð á sextíu mínútum. Ámundi Rögnvaldsson á R5 bar var sigurvegari í kokteilakeppninni sem einnig var efnt til.

 

Þórhildur Lilja Einarsdóttir átti köku ársins.  Bás Kjarnafæðis var valinn fallegasti básinn, Segull 67 átti frumlegasta básinn á sýningunni og Langabúr fékk frumkvöðlaverðlaun ársins.