Melur
Við komum inn í búrekstur foreldra Þóreyjar, þeirra Þorkels Guðbrandssonar og Guðrúnar Jónasdóttur, árið 2007 og höfum smátt og smátt verið að taka yfir og erum nú orðin ein eigendur af jörðinni.
Býli: Melur.
Staðsett í sveit: Á Mýrum í Borgarbyggð.
Ábúendur: Sigurjón Helgason og Þórey Björk Þorkelsdóttir.
Fjölskyldustærð (og gæludýra): Sigurjón, Þórey og fimm börn. Þau Ólöf Inga, 12 ára, Tinna Guðrún, 11 ára, Helgi Freyr, 7 ára, Brynjar Þór, 4 ára og Emma Dís, 2 ára. Hundarnir Spori og Loðna og kettirnir Mýra, Dóra og Gosi.
Stærð jarðar? Rúmlega 600 hektarar.
Gerð bús? Blandað, aðallega mjólkurbú.
Fjöldi búfjár og tegundir? 45 mjólkurkýr, 70 geldneyti og 150 kindur.
Hvernig gengur hefðbundinn vinnudagur fyrir sig á bænum?
Vaknað 6.30, börn græjuð í skóla og farið út í mjaltir, að þeim loknum er farið inn og fengið sér snarl. Erum að breyta fjósinu, sem er gamalt básafjós, í 60 bása lausagöngufjós. Því fara dagarnir mikið í smíðavinnu og vinnu tengda þeim breytingum þessa dagana. Kvöldmjaltir byrja um kl. 18 og er lokið um kl. 20.
Skemmtilegustu/leiðinlegustu bústörfin? Sauðburður er efst á lista hjá húsfreyjunni en allt er þetta skemmtilegt ef vel gengur.
Hvernig sjáið þið búskapinn fyrir ykkur á jörðinni eftir fimm ár? Svipaðan, en stefnum á að auka mjólkurframleiðsluna. Tökum í notkun mjaltaþjón frá DeLaval um áramót.
Hvaða skoðun hafið þið á félagsmálum bænda? Ágætlega en stundum vantar samstöðu, kjark og þor.
Hvernig mun íslenskum landbúnaði vegna í framtíðinni? Nokkuð bjartsýn um að honum vegni vel, þó að ýmis ljón séu í veginum. Til dæmis Viðreisn.
Hvar teljið þið að helstu tækifærin séu í útflutningi íslenskra búvara? Það eru tækifæri í öllum íslenskum búvörum.
Hvað er alltaf til í ísskápnum? Mjólk, skyr, smjörvi og jógurt ásamt fleiru.
Hver er vinsælasti maturinn á heimilinu? Lambakjötið slær alltaf í gegn.
Eftirminnilegasta atvikið við bústörfin? Það verður sjálfsagt þegar kýrnar verða komnar í lausagöngu og mjaltaþjónninn verður farinn að mjólka í desember.
