Meiri ásetningur og sala líflamba ástæða samdráttar

„Ekki þarf að koma á óvart að lömbum sem koma til slátrunar hafi fækkað þetta mikið á undanförnum árum, enda hefur afkoma sauðfjárbænda ekki verið til samræmis við kjör annarra stétta í landinu.“

Þetta segir Eyjólfur Ingvi Bjarnason, formaður deildar sauðfjárbænda hjá Bændasamtökum Íslands. „Aftur á móti hefur mikið áunnist síðustu tvö haust í leiðréttingu á afurðaverðinu,“ bætir hann við.

Framleiðsluvilji stjórnast af afkomu

Sagt var frá því í forsíðufrétt í síðasta Bændablaði að um 340 tonna samdráttur hafi verið í lambakjötsframleiðslu í ár miðað við á síðasta ári.

„Hluti af þessum samdrætti í ár er afleiðing af slæmu tíðarfari í vor og sumar sem leiðir af sér meiri ásetning,“ segir Eyjólfur og vísar til þess að talsvert hafi borið á því að bændur hafi misst lömb vegna óveðursins.

„Eins var eitthvað um meiri sölu líflamba í haust þar sem bú sem nýlega þurftu að fella allan bústofn vegna riðuveiki voru að taka gripi aftur eftir fjárleysi,“ útskýrir Eyjólfur.

„Við sjáum þegar fjárfjöldatölur liggja fyrir í lok árs hvort við horfum á samdrátt aftur á næsta ári eða svipaða framleiðslu, gæði gróffóðurs og magn heyfengs er víða breytilegt eftir sumarið.

Það mun hafa áhrif á frjósemi og fjölda fæddra lamba næsta vor nema bændur hugi strax að viðbótarkjarnfóðri á næstu vikum samhliða fengitíma.

Ég hef á tilfinningunni að við séum að spyrna okkur frá botninum og framleiðslan ætti að geta aukist frá og með árinu 2026 en bendi þó á að framleiðsluvilji bænda mun ætíð stjórnast af afkomu greinarinnar.“

Neytendur vilja sitt kindakjöt

Þegar Eyjólfur er spurður um hvort hækkandi vöruverð á markaði sé í einhverjum tengslum við minni framleiðslu, segir hann að horfa verði til þess að verð sauðfjárafurða á markaði hafi ekki fylgt almennu verðlagi undanfarin ár þar til hækkanir náðust á síðasta ári.

„Eðli framboðs og eftirspurnar markaða er þó alltaf að leita jafnvægis, en ég hef ekki skynjað að neytendur séu að snúa baki við kindakjöti – þeir vilja það áfram á matardiskinn sinn enda hafa rannsóknir einnig sýnt að verðteygni kindakjöts er talsverð.“