Með lífið í lúkunum

Frá ómunatíð hefur lófalestur verið talinn auðveld og örugg leið til að komast að því hvað framtíðin beri í skauti sér.

Ferköntuð hönd bendir til þess að viðkomandi sé vanabundinn í hugsun, einstrengingslegur í skoðunum og beri virðingu fyrir lögum og reglum. Yfirleitt duglegt, reglusamt og skipulagt fólk sem sýnir rökfestu að því marki að vera leiðinlegt. Sýnir sjaldan ást eða vináttu opinberlega. Fólk með ávalar hendur er aftur á móti fljótfært, fjölhæft og skapandi. Þeir sem hafa ávalar hendur eru áhrifagjarnir, skipta oft um skoðun og latir að eðlisfari.

Húðmynstrið er tengt skapgerð en aðalmynsturgerðirnar eru hvirfing, bogi, tjaldbogi, lykkja og samsett lykkja. Hvirfing lýsir einstaklingshyggju, sérvisku, sjálfsöryggi og þrjósku. Þeir sem hafa boga í húðmynstri taka lífið alvarlega og sýna stefnufestu en þjáist vegna bældra tilfinninga og eru óöruggir.

Fólk með tjaldbogamynstur er viðkvæmt, listrænt, örgeðja og metnaðargjarnt en hugsjónirnar verða oft dómgreindinni yfirsterkari. Lykkja sýnir fólk sem vill hafa það notalegt og er laust við fordóma. Þeir sem hafa samsetta lykkju eru opnir fyrir nýjungum en þá skortir innra jafnvægi og dómgreindarleysi einkennir athafnir þess.

Línurnar í vinstri hendinni sýna eðlislæga og arfgenga þætti persónuleikans, hæfileika, dugnað og getuna til að láta drauma sína rætast. Hægri höndin sýnir hvernig skapgerðareinkenni hafa þróast og hvort viðkomandi sé ánægður með hlutskipti sitt í lífinu og hvort hæfileikar fái að njóta sín. Ef lífslínan er löng og óslitin gefur hún til kynna heilbrigði, glaðværð og sterkt hjarta, sé hún stutt og bláleit bendir það til heilsuleysis. Ef línur liggja frá Venusarfjallinu að líflínunni hættir eiganda handarinnar til að fá kynsjúkdóma.

Löng höfuðlína með fáar skurðarlínur bendir til mikilla gáfna og góðs minnis. Sé hún margskorin táknar það hið gagnstæða. Höfuðlína sem bognar upp að löngutöng sýnir þrætugirni og skapofsa. Löng og óslitin hjartalína bendir til velgengni í ástum og barnaláns en snúin hjartalína finnst einungis í lófa ótryggrar og léttúðugrar manneskju. Margar hliðarlínur við litla fingur benda til þess að eigandi handarinnar deyi erlendis.

Sköpunarboginn er bunga sem liggur frá úlnlið að litla fingri. Heill bogi bendir til mikils sköpunarkrafts, frumlegrar hugsunar og hæfileika til að vinna úr hugsunum sínum. Fallegt Mánafjall lýsir ást og eindreginni löngun til að lifa í sátt og samlyndi við menn og málleysingja. Fólk með flatt Mánafjall er oft líflaust og skortir snerpu. Venusarfjallið er mikilvægasta fjall handarinnar. Sé það stórt og holdmikið táknar það lífsfyllingu og ríka hæfileika til að gleðjast, kynlífið er yfirleitt gott hjá fólki með hátt Venusarfjall. Ef fjalllið er lágt og efnislítið sýnir það tilfinningakulda og jafnvel ástleysi. Þeir sem hafa stórt Neptúnusarfjall búa yfir mikilli hæfni til mannlegra samskipta, eru hjartahlýir og skilningsríkir. Í Júpítersfjallinu má lesa metnað, félagsþroska og trúarhneigð. Ofvöxtur lýsir hroka og eigingirni en lítið gefur til kynna skort á metnaði og stolti.