Litur eyrnamerkja gefinn frjáls

Litur eyrnamerkja í sauðfé er gefinn frjáls í drögum að reglugerðarbreytingu um búfjármörk, markaskrár og takmörkun á sammerkingum búfjár.

Litur eyrnamerkja í sauðfé er gefinn frjáls með breytingum á reglugerð um búfjármörk, markaskrár og takmarkanir á sammerkingum búfjár nr. 200/1998. Í kynningu á reglugerðinni segir að þetta sé eina efnislega og veigamikla breytingin sem lögð er til. Hingað til hefur sauðfjárbændum borið skylda til að nota tiltekna liti á eyrnamerki sauðfjár, allt eftir því hvaða varnarhólfi þeir tilheyra.

„Í áranna rás hefur varnarhólfum fækkað, en litir eyrnamerkja hafa haldist óbreyttir á „afmörkuðum landsvæðum“ sem upphaflega voru stök varnarhólf. Af þessari ástæðu eru í dag nokkrir litir (allt að fjórir litir) í einu og sama varnarhólfinu og því hefur litamerking misst upphaflegt gildi sitt. Við þessu er brugðist með því að setja ákvæði í reglugerðina um merkingar og skráningar dýra þess efnis að litur eyrnamerkja í sauðfé er gefinn frjáls.“

Breytingar á reglugerðinni eru annars nokkuð víðtækar, en eru þó flestar ætlaðar til samræmingar þannig að ákvæði sem fjalla um skyldumerkingar og samsetningu auðkenna eru tekin út, t.d. örmerkingar hrossa og þeim efnislega gerð skil í nýrri reglugerð um merkingar og skráningar dýra.

Þannig mun reglugerðin eingöngu fjalla um mörkun dýra sem í flestum tilvikum er ekki skylt að gera, heldur leyfilegt að framkvæma og þá með tilteknum skilyrðum sem byggja á aldargömlum hefðum. Þó er skylt að marka lömb. Mörk, hvort heldur þau eru eyrnamörk, brennimörk eða frostmörk eru hópmerking og voru upphaflega til þess að sýna fram á eignarhald og uppruna til hjarðar.

Reglugerðin er í samráðsgátt og er þar til umsagnar til 3. júlí.