Landslagið í landbúnaði og matvælaframleiðslu
Landbúnaðarháskóli Íslands í samstarfi við Bændasamtök Íslands, Matís, Ráðgjafarmiðstöð landbúnaðarins, Samtök ungra bænda, Samtök smáframleiðenda matvæla/Beint frá býli og Samtök fyrirtækja í landbúnaði stendur að málþingi sem haldið verður fimmtudaginn 7. mars kl. 10–16 á Hvanneyri.
Haldin verða fjölbreytt erindi og að þeim loknum verða pallborðsum- ræður þar sem erindin verða rædd og spurt verður hvar þörf er á að ýta við málum til að landbúnaður geti verið arðsöm atvinnugrein sem sóst er eftir að starfa í. Íslenskur landbúnaður er ein af undirstöðuatvinnugreinum íslensks samfélags og íslensk matvælaframleiðsla ein af grunnstoðum þess að við byggjum sjálfbært og sjálfstætt samfélag til framtíðar. Mikilvægt er að standa vörð um íslenskan landbúnað til framtíðar til að tryggja fæðu- og matvælaöryggi og um leið er ljóst að víða liggja vannýtt tækifæri í íslenskum landbúnaði. Með málþinginu viljum við ná saman helstu hagaðilum í landbúnaði hér á landi til að ræða stöðu íslensks landbúnaðar í dag, tækifærin sem víða blasa við og hvernig við getum nýtt þau sem best, íslensku samfélagi til framþróunar.
„Kveikjan að málþinginu var samtal mitt við fulltrúa afurðastöðvar um stöðuna í landbúnaði. Við vorum sammála um að auka mætti samstarf aðila, huga þyrfti í auknum mæli að allri virðiskeðjunni og skapa aukin verðmæti úr þeim úrvals hráefnum sem íslenskur landbúnaður hefur upp á að bjóða. Það er von okkar að málþingið og annað samtal sem á sér stað innan greinarinnar leiði okkur að farsælum lausnum sem styrkir íslenskan landbúnað og matvælaframleiðslu til framtíðar,“ segir Ragnheiður Þórarinsdóttir, rektor Landbúnaðarháskóla Íslands.
Rektor Landbúnaðarháskólans opnar málþingið og síðan tekur við erindi frá fulltrúa Samtaka fyrirtækja í landbúnaði, SAFL, sem mun fara yfir hvaða skref er verið að taka til að einfalda regluverkið. Fulltrúar frá mjólkuriðnaðinum, kjötframleiðendum og grænmetis- bændum verða með erindi um nýsköpun og þróun í þeim geirum. Þá mun fulltrúi frá Matís fara yfir hvernig yfirfæra megi reynsluna úr sjávarútvegi yfir á landbúnaðinn.
Að loknu hádegishléi verður farið yfir rannsóknir og verkefni sem eru í gangi hjá deild Ræktunar og fæðu við Landbúnaðarháskóla Íslands. Gunnar Þorgeirsson, formaður Bændasamtaka Íslands, ræðir svo um áskoranir nútímans og hvernig þeim er best mætt. Þá tekur Steinþór Logi Arnarson, formaður Samtaka ungra bænda, við og ræðir stöðu ungra bænda í dag. Að lokum fer síðan Oddný Anna Björnsdóttir, framkvæmdastjóri Samtaka smáframleiðenda/Beint frá býli, yfir áskoranir og tækifæri hjá smáframleiðendum.
Að loknum erindum verða borðaumræður sem lýkur með pallborðsumræðum þar sem tekin verða saman umræðuefni dagsins og rætt hvar ýta þurfi við málum svo landbúnaður verði arðsöm atvinnugrein og aðlaðandi að starfa í.
Það er einlæg ósk aðila sem standa að málþinginu að þátttaka verði góð og að sem flest sem málið varða komi og ræði saman. Málþinginu verður einnig streymt en við hvetjum fólk til að mæta á Hvanneyri og standa saman að eflingu landslagsins í landbúnaði og matvælaframleiðslu. Nánari upplýsingar munu birtast á vef Landbúnaðarháskóla Íslands.
Öll velkomin.
