Lán að ekki fór verr
Um sex þúsund varphænur drápust í eldsvoðanum sem varð í eggjabúi hjá Nesbúeggjum á Vatnsleysuströnd aðfaranótt 17. nóvember.
Að sögn Stefáns Más Símonarsonar framkvæmdastjóra hefur tjónið ekki verið metið til fulls, en þó sé vitað að ef reisa ætti sambærilegt hús og þarna brann myndi það kosta um 150 milljónir. Þar liggi langstærsti hluti hins fjárhagslega tjóns, en síðan sé tjónið á varphænunum sem sé meira tilfinningalegt.
Stefán telur að um 15 prósent af þeim varphænum sem voru á starfsstöðinni á Vatnsleysuströnd hafi drepist en fyrirtækið er þar með sex samliggjandi hús sem tengjast starfseminni. „Það var í raun mikið lán að ekki fór verr, en í þessu húsi sem brann var skilgreint brunahólf sem hélt og því horfum við ekki upp á mun verra tjón,“ segir Stefán.
Hann segir ekki alveg ljóst hvernig staðið verði að því að endurreisa þann hluta framleiðslunnar sem brann. „Það er hin vegar klárt að við munum koma sambærilegum fjölda fugla fyrir í nýju eða gömlu húsnæði með einhverjum hætti áður en langt um líður því við viljum halda áfram að keyra okkar bú á fullum afköstum,“ segir Stefán og bætir við að gera megi ráð fyrir að sex þúsund varphænur skili um 100 tonnum eggja á hverju ári.
Nesbúegg eru með starfsemi á þremur öðrum stöðum á landinu og eru næststærsti eggjaframleiðandi landsins á eftir Vallá.
