Kyngreining sæðis framtíðin
Alþjóðlega fyrirtækið Sexing Technologies hefur nú öðru sinni komið upp færanlegri tilraunastöð við nautastöðina á Hesti í Borgarfirði. Þar er framkvæmd kyngreining á sæði úr nautgripum sem fer í dreifingu á næstu vikum.
Fyrsta heimsókn tilraunastöðvarinnar var í desember í fyrra, en þá var unnið að tilraun til að kanna hvort sæði íslenskra nauta hentaði í kyngreiningu. Sveinbjörn Eyjólfsson, forstöðumaður Nautastöðvarinnar á Hesti, segir helstu niðurstöður vera þær að sæðið þolir vel kyngreiningaferlið og á næstu vikum geta kúabændur pantað sæði.
„Með kyngreindu sæði geturðu verið nánast fullviss um að fá kvígukálfa undan betri hluta kúnna þinna,“ segir Sveinbjörn. Hingað til hafi kúabændur þurft að setja nánast alla kvígukálfa á til þess að halda uppi framleiðslunni, en núna verði hægt að velja úr og þar með hraða kynbótum á kúastofninum. Standi ekki til að rækta undan lakari kúm geti bændur pantað holdanautasæði þar sem kyngreint er fyrir nautum.
Sveinbjörn segir afköstin við kyngreininguna vera miklu meiri en þegar bíllinn kom í fyrra, því að þá þurfti bæði að vinna venjulegt og kyngreint sæði úr sömu sæðistökunni til þess að nota við samanburðartilraunina. „Núna lögðum við upp með að taka sæði úr tíu tuddum af íslenska kyninu og tveimur Aberdeen Angus, en trúlega getum við bætt við einhverjum íslenskum þar sem það gengur svo vel.“
Kyngreiningin hófst 15. ágúst og til stendur að ljúka vinnunni fyrstu dagana í september. Sveinbjörn gerir ráð fyrir að núna verði til á bilinu þrjú til fjögur þúsund kyngreindir sæðisskammtar úr nautum af íslenska mjólkurkúakyninu. Sveinbjörn segir að sæðisskammtarnir muni ekki duga í heilt ár ef bændur taka vel í að nota kyngreint sæði. Því sé til skoðunar að tilraunastöðin komi tvisvar á ári til landsins hér eftir. Þar með gefist jafnframt færi á að taka sæði úr fleiri nautum, en á hverjum tíma séu ekki nema rúmlega tíu naut í stöðinni sem geta gefið sæði. „Það verður ekkert stopp héðan af,“ segir Sveinbjörn, sem gerir ráð fyrir að þetta sé framtíð íslenskrar nautgriparæktar.
