Kvenfélagasamband vill betri heilbrigðisþjónustu á landsbyggðinni
Kvenfélagasamband Suður-Þingeyinga hélt aðalfund á dögunum þar sem félagskonur lögðu áherslu á heilbrigðismál á landsbyggðinni og eignarétt kvenna til jafns við maka sinn.
Kvenfélagasamband Suður-Þingeyinga hélt aðalfund nýverið og gaf út ályktun þar sem gagnrýnd var sú töf sem orðið hefur á afhendingu á gjöf Kvenfélagasambands Íslands, Gjöf til allra kvenna. Félagið skorar á heilbrigðisyfirvöld að tryggja að afhending fari fram alls staðar á landinu fyrir árslok 2025. Gjöf til allra kvenna snýr að hugbúnaði og tengiboxum sem gera læknum og ljósmæðrum kleift að skoða og vinna með fósturhjartsláttarrit á rafrænan hátt sem og að nýta gagnagrunn fósturgreiningardeildar Landspítalans á landsbyggðinni. Gjafirnar þykja veruleg viðbót við eftirlit með heilbrigði kvenna um allt land.
Á sama fundi vildi Kvenfélag Reykdæla beina því til flugmálayfirvalda að tryggja þyrfti opnar flugbrautir fyrir sjúkraflug af landsbyggðinni, það væri lífsnauðsynlegt fyrir veika og slasaða á stærstum hluta landsins. Þar er nefnt sérstaklega óheft aðgengi sjúkraflugvéla að Reykjavíkurflugvelli og að tryggja sjúkraflug frá Aðaldalsflugvelli.
Þá vildi Kvenfélag Fnjóskdæla skora á konur að gæta réttinda sinna til jafns við maka sinn varðandi fjármál og eigur. „Samkvæmt lögum um einkahlutafélög geta fleiri en einn eigandi verið skráðir fyrir þeim. Oft er þó aðeins einn aðili skráður fyrir lögbýli og er það yfirleitt karlmaðurinn. Ef hann fellur frá tekur við langt og flókið ferli fyrir makann til að fá prókúru fyrir búinu,“ segir í greinargerð félagsins.
